Almatydaǵy Natalııa Sats teatry 6 qarashada qaıta ashylady
ALMATY. KAZINFORM — 6-8 qarasha Almatydaǵy Natalııa Sats atyndaǵy memlekettik akademııalyq orys balalar men jasóspirimder teatry kórermenderdi qaıta qabyldaıdy.
Jóndeý jumystarynan soń, teatrdyń ashylýyna oraı arnaıy baǵdarlama ázirlendi. Kórermender «Etik kıgen mysyq» mýzykalyq ertegisin, «Shekspırge degen qushtarlyq» komedııasyn jáne «SATs. Úıge oralý» gala-qoıylymyn tamashalaı alady.
— Tarıhı ǵımarattyń sáýlettik kelbeti saqtalyp, ishindegi ınjenerlik jeliler, dybys, jaryq jáne sahna jabdyqtary jańǵyrtyldy. Restavratorlar mozaıkalyq kompozıtsııalardy, mármár betterdi jáne ıntererdiń basqa da qurylymdaryn qalpyna keltirdi. Negizgi sahna zamanaýı tehnıkalyq quraldarmen jabdyqtalyp, qoıylym qoıý múmkindikteri keńeıdi, — delingen habarlamada.
Teatrdyń janynan Qazaqstan men Reseıdiń eńbek sińirgen qaıratkeri, 1986-2005 jyldary teatrdy basqarǵan Borıs Preobrajenskıı atyndaǵy shaǵyn sahnasy bar jańa ǵımarat salyndy.
260 kórermenge arnalǵan zal Black Box formatynda jasalǵan. Onyń basty ereksheligi — qoıylymnyń mazmunyna qaraı sahna men kórermen oryndarynyń ornalasýyn ózgertýge bolady.
Jańa ǵımaratta bir úlken jáne eki shaǵyn daıyndyq zaly, balet synyby men kórkemdik-óndiristik sheberhana jabdyqtalǵan.
Kishkentaı kórermender úshin Baby Hall keńistigi ashylady. Munda balalar teatr álemimen tanysa alady. Sonymen qatar kitap oqýǵa jáne shyǵarmashylyq kezdesýler ótkizýge arnalǵan Book Hall men «Sats ComUnity» balalar stýdııasynyń oqý teatry bar.
Endi teatr negizgi jáne shaǵyn sahnalarda qoıylymdardy qatar kórsete alady. Al qosymsha bólmeler daıyndyq jumystaryna, balalar stýdııasynyń sabaqtaryna jáne shyǵarmashylyq kezdesýlerge paıdalanylady.
Ashylý baǵdarlamasy:
- 6 qarasha, saǵat 11:00 — «Etik kıgen mysyq» mýzykalyq ertegisi;
- 6 qarasha, saǵat 19:00 — «Shekspırge degen qushtarlyq» komedııasy;
- 7 qarasha — teatrdyń týǵan kúni men jańartylǵan ǵımarattyń ashylýyna arnalǵan «SATs. Úıge oralý» gala-qoıylymy;
- 7 jáne 8 qarasha, saǵat 12:00 — «Etik kıgen mysyq» mýzykalyq ertegisi;
- 7 jáne 8 qarasha, saǵat 18:00 — «Shekspırge degen qushtarlyq» komedııasy.
Eske salaıyq, Almatydaǵy Áýezov teatrynyń jóndeý jumystary qashan aıaqtalatyny jazyldy.
