Almatydaǵy muzdaq kólder táýlik boıy baqylaýǵa alyndy
ALMATY. KAZINFORM - Almatyda sel qaýpiniń aldyn alý maqsatynda muzdaq kólderdiń jaı-kúıin táýlik boıy baqylaıtyn bes bıik taýly maýsymdyq baqylaý beketi jumysyn bastady.
Almatyda Tótenshe jaǵdaılar mınıstrliginiń «Qazseldenqorǵaý» memlekettik mekemesi muzdaq kólderdiń jaı-kúıin úzdiksiz baqylaýǵa arnalǵan bes bıik taýly baqylaý beketin iske qosty.
Baqylaý beketteri Úlken Almaty ózeni alabyndaǵy № 13-bıs jáne № 10 kólderde, Aqsaı ózeni alabyndaǵy № 8 jáne № 9-10 kólderde, sondaı-aq «Kúmbel» gıdrobeketiniń joǵarǵy bóliginde ornalasqan.
Mamandardyń málimetinshe, maýsymdyq beketter gıdrologııalyq jaǵdaıdy turaqty baqylaýǵa, muzdaq kólderdegi ózgeristerdi der kezinde anyqtaýǵa jáne qaýip tóngen jaǵdaıda jedel aqparat taratýǵa múmkindik beredi.
Muzdaq kólderge táýlik boıy monıtorıng sel qaýpi kezeńi aıaqtalǵanǵa deıin jalǵasady. Buǵan deıin dál osyndaı bıik taýly baqylaý beketteri Almaty oblysynda da iske qosylǵan bolatyn.
TJM bul sharalar muzdaq kólderdiń jarylýynan týyndaýy múmkin sel qaýpiniń aldyn alyp, turǵyndardyń qaýipsizdigin qamtamasyz etýge baǵyttalǵanyn atap ótti.
Eske salaıyq, buǵan deıin TJM Almaty oblysyndaǵy taý kólderin baqylaý beketterin ashqanyn habarlaǵanbyz.
