Almatydaǵy metro qurylysynan 5 mıllıard qarjy jymqyrǵan 10 adamǵa qatysty úkim shyqty
ALMATY. KAZINFORM — Almaty qalasynyń Almaly aýdandyq sotymen ońtústik astanadaǵy metro qurylysy kezinde 5 mıllıard teńgeden astam bıýdjet qarajatyn jymqyrdy dep aıyptalǵan 10 adamǵa qatysty úkim shyqty. Qylmysqa qatysty sotqa deıingi tergep-tekserýdi kólik prokýratýrasy júrgizdi. Bul týraly Bas kólik prokýratýrasy málimdedi.
Málim bolǵandaı, sottalýshylar «Metropolıten» KMK, «Almatymetroqurylys» AQ, «Avtomattandyrý jáne tehnologııalar qyzmeti» JShS-da basshylyq laýazymda otyryp, sybaılas toppen birge 2018 jyldyń maýsymynan 2020 jyldyń tamyzyna deıingi kezeńde «Saryarqa» jáne «Dostyq» stantsııalaryn salý barysynda qarjy jymqyrǵan. Aılasyn asyrǵandar qujatta jabdyqtyń qunyn artyq kórsetip (is júzinde 10 ese), turaqty túrde iri kólemdegi aqshalardy jalǵan fırmalar arqyly shyǵarǵany dáleldendi.
Sot sheshimimen Almaty metrosynyń burynǵy basshysy Erbol Ábildınovqa 8 jyl bas bostandyǵynan aıyrý jazasy taǵaıyndaldy. Sondaı-aq E.Abjappar men E.Qapaev 8 jylǵa, J.Arısova men N.Arısov 7 jyl 6 aıǵa, V.Hen 7 jylǵa sottaldy. J.Arısovanyń 2023 jyly týylǵan sábıiniń bolýyna baılanysty oǵan jazany óteý merzimi 5 jylǵa keıinge qaldyryldy. Qalǵan aıyptalýshylar - Q.Bekmuhambet pen A.Rahymjanov 2 jyl 9 aıǵa, al A.Hegaı men N.Akıshevke 1 jylǵa bas bostandyǵynan aıyrý jazasy taǵaıyndaldy.
Sonymen qatar Erbol Ábildınov ómir boıyna, al qalǵan aıyptalýshylar belgili bir merzimge qarjy salasyndaǵy jaýapty laýazymdardy jáne basshylyq laýazymdardy atqarý quqyǵynan aıyryldy.
Sot E.Ábildınov, E.Abjappar, E.Qapaev, J.Arısova, N.Arısov jáne V.Henniń árqaısysyn 50 mln 893 myń teńge shyǵyndy óteýge mindettedi.
Sonymen qatar, sot 1 mlrd teńgeden astam somaǵa tyıym salynǵan múlikti tárkileýdi qoldanyp, memleketke keltirilgen shyǵyndy óndirdi.
Sot úkimi zańdy kúshine engen joq.
Aıta keteıik, buǵan deıin «Metropolıten» KMK-da 5 mlrd teńge jymqyrý deregi boıynsha tergeý 2023 jyly 28 tamyzda aıaqtalǵanyn jazǵan edik.
Sondaı-aq «Sary arqa» jáne «Baýyrjan Momyshuly» jańa metro stansalarynyń qurylysy kezindegi 5 mıllıard teńgeniń urlanýyna qatysty sot protsesiniń barysy týraly jazǵanbyz.
