Almatydaǵy mektepte alty oqýshy tútinnen ýlandy

ALMATY. KAZINFORM – Almatydaǵy mamandandyrylǵan gımnazııalardyń birinde mekteptegi is-shara kezinde jasandy tútin shyǵaratyn qurylǵydan balalar zardap shekti.

Qalalyq bilim basqarmasynyń málimetinshe, 9 aqpanda №199 mamandandyrylǵan gımnazııanyń akt zalynda ótken mádenı shara kezinde sahnalyq tútin shyǵaratyn qurylǵy paıdalanylǵan. Ony qoldanǵannan keıin birneshe bala ózin jaısyz sezinip, jótelip, kózinen jas aǵa bastaǵan.

– Gımnazııa ákimshiligi dereý qajetti sharalardy qabyldady. Balalardy medıtsına qyzmetkeri tekserip, jedel járdem shaqyryldy. Almaty qalalyq balalarǵa shuǵyl medıtsınalyq kómek kórsetý ortalyǵyna jasy 12-degi alty bala «jasandy tumannan ýlaný» belgilerimen jetkizildi. Barlyǵy profıldik toksıkologııa bólimshesine jatqyzyldy. Jaǵdaılary – ortasha aýyr, turaqty. Emdeý Densaýlyq saqtaý mınıstrliginiń dıagnostıka jáne emdeý hattamasyna sáıkes tolyq kólemde júrgizilip jatyr, - dep habarlady basqarma.

Oqıǵa boıynsha qyzmettik tekseris júrgizildi. Qurylǵyny qoldanýǵa jol bergen pedagog tártiptik jaýapkershilikke tartyldy.

Ulttyq saraptama ortalyǵynyń mamandary aýa synamalaryna zerthanalyq taldaý júrgizdi. Onyń nátıjesi keıinirek habarlanady.

Gımnazııada jappaı is-sharalar ótkizý kezinde qaýipsizdik talaptaryn saqtaý boıynsha baqylaý kúsheıtildi. Jaǵdaı mektep ákimshiligi men qalalyq bilim basqarmasynyń baqylaýynda.

Eske salaıyq, buǵan deıin Almaty-2 temirjol vokzalynda 52 tabıǵı gazdan ýlanǵanyn, onyń ishinde 10 balanyń aýrýhanaǵa jatqyzylǵanyn habarlaǵanbyz.