Almatydaǵy mektep janyndaǵy demalys lagerleri erekshe jumys júıesine kóshti
ALMATY. KAZINFORM — Bıyl Almatydaǵy oqýshylardyń 96 paıyzǵa jýyǵy jazǵy demalysta saýyqtyrý sharalarymen jáne túrli úıirmemen qamtyldy.
Almaty bilim basqarmasynan málim etkendeı, bıyl 281 myń oqýshy jazǵy demalysta saýyqtyrý sharalarymen jáne túrli úıirmemen qamtyldy. Bul 1-10 synyp aralyǵynda oqıtyn almatylyq 293 682 balanyń 95,7 paıyzy. Byltyr 266 343 lagerlerde demalǵan bolatyn.
Bıyl mektep janyndaǵy lagerlerdiń jumysy erekshe mazmundy ári qyzyqty ótip jatyr. Munda balalar jent jasaýdy, qurt jaıyp, keptirýdi, úırenip, qolóner buıymdaryn tigýge mashyqtanady. Sonymen qatar hantalapaı, asyq atý, kúres sııaqty ulttyq oıyndardyń qyr-syryna qanyǵady.
Budan bólek, bala talabyna qaraı robototehnıkany nemese dombyra, jetigen, baıan sııaqty mýzykalyq aspaptardy úıretetin salany tańdaı alady. Sport, shyǵarmashylyq, ekologııalyq etnomádenıet, IT jáne patrıottyq tárbıege baǵyttalǵan lagerler de bar. Jaqynda qala syrtyndaǵy lagerler jumysyn bastaıdy. Qazir uıymdastyrý sharalary júrip jatyr.
— Qalada 200-den astam jalpy bilim beretin mektep bar. Bıyl oqý jyly aıaqtalǵannan keıin birden mektep janyndaǵy lagerler jumysyn bastady. Eń bastysy — balalar lagerge jergilikti bıýdjet esebinen tegin baryp júr. Sondaı-aq, 26 mamyrdan bastap 9 maýsymǵa deıin bastaýysh synyp oqýshylary men áleýmettik osal toptaǵy balalar lagerlerde tegin tamaqpen qamtyldy. Al, shilde aıynda mektepter jańa oqý jylyna daıyndyq júrgizip, jóndeý jumystaryna kirisedi. Keıin tamyz aıynda lagerler qaıta ashylyp, taǵy tańerteńnen túske deıin balalardy tegin qabyldaıtyn bolady, — deıdi qalalyq bilim basqarmasy basshysynyń orynbasary Marat Tájibaev.
Sonymen qatar, ol jaqyn arada qala syrtyndaǵy lagerler de jumysyn bastaıtynyn jetkizdi. Qazir balalardy demalysqa qabyldaýǵa daıyn uıymdar arasynda konkýrs ótip jatyr.
— Budan bólek, qosymsha bilim berý úıirmeleri de jumys istep tur. Qalada 19 memlekettik jáne 122 jekemenshik qosymsha bilim berý mekemesi bar. Onda 40 myńnan astam bala memleket esebinen qosymsha bilim alyp jatyr, — dedi Muhtar Tájibaev.
Máselen, № 140 mektep janyndaǵy sporttyq baǵyttaǵy lagerde 5–6 synyp oqýshylary ártúrli sport túri boıynsha tereńdetilgen daıyndyqtan ótip jatyr. Munda voleıbol, fýtbol, toǵyzqumalaq jáne basqa da ulttyq oıyndar boıynsha jattyǵýlar uıymdastyryldy. Lager baǵdarlamasy teorııalyq bilim berýdi de qamtıdy — bul balalardyń sporttyq tártibin nyǵaıtyp, komandalyq rýhyn qalyptastyrady.
№ 97 mektep janynan ashylǵan «Arman» lagerinde balalar sporttyq jáne shyǵarmashylyq sharalarǵa, ekskýrsııalar, zııatkerlik oıyndar men sheberlik sabaqtarǵa qatysyp jatyr.
Almaty qurylys-tehnıkalyq kolledji bazasynda «Jazda mamandyq tańdaıyq» atty baǵdarlama qolǵa alyndy. Munda joǵary synyp oqýshylary aǵash óńdeý isin, grafıkalyq dızaındy meńgerip, qural-saımandarmen jumys isteýdi, sondaı-aq SketchUp arqyly 3D-modeldeýdiń negizderin meńgerip jatyr.
Patrıottyq jáne mádenı tárbıege de erekshe nazar aýdaryldy. № 208 mektep janynan ashylǵan «Etno City» etnolageri — jas urpaqtyń boıynda patrıottyq sezim men ulttyq mádenıetke degen qurmetti qalyptastyratyn erekshe alań.
Naýryzbaı aýdanyndaǵy Oqýshylardyń ınnovatsııalyq shyǵarmashylyǵy ortalyǵynda ashylǵan IT-lagerde 7 jastan 15 jasqa deıingi balalar baǵdarlamalaý negizderin meńgerip, elektronıkamen tanysyp, túrli ǵylymı tájirıbelerdi júzege asyryp jatyr.
Buǵan deıin Oqý-aǵartý mınıstrligi jazǵy demalys kezinde oqýshylarǵa qandaı jeńildikter qarastyrylǵanyn túsindirgen edi.
Sondaı-aq Qazaqstanda balalar lageriniń quny týraly jazǵanbyz.