Almatydaǵy LRT jobasy qaı kezeńde
ALMATY. KAZINFORM — Almatyda jeńil relsti kólik (LRT) jelisiniń birinshi kezegin salýǵa arnalǵan tehnıkalyq-ekonomıkalyq negizdemeni ázirleý jalǵasyp jatyr.
Qalalyq jol-kólik ınfraqurylymyn damytý basqarmasynyń málimetinshe, LRT-nyń birinshi kezegi Almaty-2 temirjol vokzalynan bastalyp, Abylaı han dańǵyly, Tóle bı jáne Momyshuly kósheleri boıymen Alataý aýdanyndaǵy Momyshuly kóshesiniń batys jaǵynda, Indýstrııalyq aımaqtyń ońtústiginde ornalasatyn depoǵa deıin sozylady.
Birinshi kezektiń uzyndyǵy — 18,3 shaqyrym. Al jalpy jeliniń uzyndyǵy 32,5 shaqyrym bolady dep josparlanǵan.
— Jeńil relsti kóliktiń birinshi jelisiniń alǵashqy kezeńin salýǵa arnalǵan tehnıkalyq-ekonomıkalyq negizdeme daıyn bolǵannan keıin ǵana jobanyń tehnıka jáne qarjyǵa qatysty derekteri, naqty quny, qarjylandyrý kózi, júzege asyrý merzimi, memlekettik qoldaý sharalary men ınvestıtsııa kólemi anyqtalady, — dedi basqarma basshysynyń mindetin atqarýshy Asan Bostanov Kazinform saýalyna bergen jaýabynda.
Aıta keteıik, Almatyda LRT salý ıdeıasy 2018 jyldan beri talqylanyp keledi. Alǵashqy joba nusqasynda uzyndyǵy 22,7 shaqyrym bolatyn eki jolda 37 stantsııa qarastyrylǵan. Qozǵalys ıntervaly — eń kóp degende 4 mınýt, al bir táýliktegi jolaýshylar sany 76-112 myń adam bolady dep boljanǵan. Kommertsııalyq ortasha jyldamdyq 22 shaqyrym/saǵ, al jobany júzege asyrý merzimi 2019-2042 jyldar aralyǵynda josparlanǵan edi.
Keıin qurylys birneshe ret keıinge shegerildi. 2020 jyly bastaý josparlanǵanymen, TEN boıynsha jobanyń ınvestıtsııalyq quny 94,2 mlrd teńge (QQS-pen birge) dep baǵalanyp, qarjylyq máselelerge baılanysty toqtatylǵan.
2021 jyly sol kezdegi qala ákimi Baqytjan Saǵyntaev jobany júzege asyrýǵa shamamen 1 mlrd AQSh dollary qajet bolatynyn, qarjylandyrý tetigi talqylanyp jatqanyn málimdegen. Keıin qalalyq ákimdik jobany qarjylandyratyn ınvestor tabylǵanyn habarlady.
2022 jyly bılik ókilderi Tóle bı kóshesiniń boıymen ótetin LRT jelisiniń alǵashqy jelisin 2027 jylǵa qaraı iske qosýdy josparlap otyrǵanyn aıtty.
2023 jyly bul másele qaıtadan kún tártibine shyqty. Almatynyń jańa Bas josparyn ázirleýshi, kólik salasynyń sarapshysy Roman Barabanov qalanyń damýy tranzıtke baǵyttalǵan qaǵıdaǵa negizdeletinin atap ótti. Onyń aıtýynsha, bul tujyrymdamany sátti iske asyrý úshin BRT, LRT, metro sııaqty magıstraldy qoǵamdyq kólik dálizderin jáne jaıaý júrginshilerge yńǵaıly qashyqtyqta ornalasqan arnaıy jolaqtardy damytý qajet.
2023 jyly jeltoqsanda jańa LRT júıesiniń alǵashqy bóligi 2027 jylǵa deıin salynatyny habarlandy. Jeli Momyshuly, Tóle bı jáne Raıymbek dańǵyldarynyń boıymen ótedi jáne qalanyń shyǵys shetine deıin sozylady.
Jaqynda Almatyda LRT jelisine arnalǵan depo salynatyny belgili boldy. Ol Alataý aýdanyndaǵy Indýstrııalyq aımaqta ornalasady. Bolashaqta LRT jelisi Almaty-2 temirjol vokzalyn «Barlyq» jáne «Shyǵys» kólik toraptarymen baılanystyrady.