Almatydaǵy LRT: Tóle bı kóshesiniń taǵy bir bóliginde jol jabyldy
ALMATY. KAZINFORM — Almatyda LRT jobasyn júzege asyrý aıasynda Tóle bı kóshesinde kólik qozǵalysyna ýaqytsha shekteý engiziledi. Bul týraly qala ákimdiginiń baspasóz qyzmeti habarlady.
Atap aıtqanda, Ótegen batyr kóshesinen Vılıýıskaıa kóshesine deıingi aralyqta shyǵys baǵytyndaǵy avtokólik qozǵalysy ýaqytsha shekteledi.
Bul aýmaqta Tóle bı kóshesiniń soltústik jaǵynda reversıvti qozǵalys uıymdastyrylady.
Injenerlik jelilerdi kóshirý jumystary 16-18 shilde aralyǵynda júrgiziledi.
— Al 18–20 shilde aralyǵynda dál osyndaı jumystar kósheniń qarama-qarsy jaǵynda atqarylady. Osy kezeńde reversıvti qozǵalys Tóle bı kóshesiniń ońtústik jaǵynda uıymdastyrylady, — delingen habarlamada.
Ákimdik ókilderi júrgizýshilerge jol baǵytyn aldyn ala josparlap, ýaqytsha jol belgileriniń talaptaryn qatań saqtaýdy eskertti.
Eske salaıyq, buǵan deıin Almatyda Tóle bı kóshesin uzartý jobasy aıasynda júrgiziletin qurylys-montaj jumystaryna baılanysty kólik qozǵalysyna ýaqytsha shekteý engiziletinin habarlaǵan edik.
