Almatydaǵy laı kóshkini: ákimdik pen qutqarý qyzmeti qalaı jumys istedi
ASTANA. KAZINFORM – Almatyda laı kóshkini saldarynan qıraǵan úı astynda qalǵan barlyq adamnyń denesi tabyldy. Sondaı-aq, Taý Samaly shaǵyn aýdanynda bolǵan tabıǵı apatqa qatysty túsinikteme berildi.
Búgin túnde Almaty qalasynda jyljyma túsken orynda avarııalyq-qutqarý jumystary júrgizilip jatqany habarlandy. Tótenshe jaǵdaılar mınıstrligi adamdar evakýatsııalanyp, keıbiri izdestirilip jatqany týraly aqparat taratty.
«Oqıǵa ornynda „Qazseldenqorǵaý“ MM, Almaty qalasynyń „109 qutqarý qyzmeti“ MM, Respýblıkalyq jedel-qutqarý jasaǵynan, Almaty qalasy TJD, TJM 28237áskerı bóliminen, jedel medıtsınalyq kómek brıgadasynan, Medeý aýdanynyń ákimdiginen 160-tan astam adam jáne 30 birlik tehnıka jumyldyryldy», — delingen habarlamada.
Sondaı-aq, dárigerler brıgadasy kezekshiligi uıymdastyrylǵan. Oqıǵa ornynda Tótenshe jaǵdaılar departamentiniń psıhologııalyq toby jumys istep jatyr.
Odan bólek úılerdiń jaqyn ornalasýy, tehnıkany paıdalaný múmkindiginiń bolmaýy jumystardy qıyndatyp jatqany aıtyldy.
Tańerteń Almaty ákimi Erbolat Dosaev topyraqtyń laılanýy saldarynan bolǵan tehnogendik sıpattaǵy laı kóshken jerge bardy.
Sol jerde qala basshysy búlingen ǵımarattardy aralap, shuǵyl kóshpeli keńes ótkizip, tapsyrma berdi. Atap aıtqanda, oqıǵanyń sebepterin tekserý jáne laı kóshkini saldaryn joıý boıynsha arnaıy top quryldy. Kórshilerdiń aıtýynsha, laı astynda qalǵan úıde 4 adamnan turatyn otbasy bolǵan.
Almaty qalalyq Tótenshe jaǵdaılar departamentiniń málimetinshe, saǵat 10:36–daǵy aqparat boıynsha laı basyp qalǵan jerden bir adamnyń denesi tabyldy.
«Qazirgi ýaqytta jeke turǵyn úıdi laıdan tazartý jáne adamdardy izdeý jumystary júrgizilýde. Oǵan 182 maman men 32 tehnıka jumyldyryldy. Jedel járdem brıgadalary jumys istep jatyr. Týystary men kórshilerine jedel psıhologııalyq kómek kórsetildi. Іzdeý-qutqarý jumystary jalǵasýda», — degen aqparat taratyldy vedomstvodan.
Medeý aýdanynyń ákimi Erkebulan Orazalın laı kóshkininen keıin úıindi astynan izdestirilip jatqan otbasy týraly aıtty.
Onyń aıtýynsha, úıde erli-zaıypty men 2007 jyly týǵan egiz uly bolǵan. Balalar № 48 mektepte oqıdy. Olar sol kúni sabaqqa barmaǵan.
«Mektep dırektory da osynda. Túnde polıtsııa basqarmasy arqyly otbasynyń uıaly telefondaryn izdedik. Telefondarǵa sıgnal túsken joq. Telefondar úıde degen aqparat bar», — dedi ákim.
Aýdan ákiminiń málimdeýinshe, úıler durys salynbaǵan. Sondaı-aq, aýdan basshysy durys ornatylmaǵan drenaj júıesi jáne taýdaǵy úılerdiń júktemesi sebep bolýy múmkin degen paıym jasady. Onyń mán-jaıyn arnaıy komıssııa qaraıdy.
Araǵa ýaqyt salyp qutqarýshylar qıraǵan úı astynda qalǵan 3 adamnyń denesin tapty.
«Qutqarýshylar oqıǵa ornynan 1984 jyly týǵan er adam men 1980 jyly týǵan áıeldiń jáne 2007 jylǵy eki jas jigittiń denesin shyǵardy», — dep habarlady qalalyq TJD.
Tótenshe jaǵdaılar mınıstrliginiń psıhologtary marqumdardyń týystary men kórshilerine jedel psıhologııalyq kómek kórsetýde.
Jańa ǵana laı kóshken jerlerde kommýnıkatsııalarǵa qosý jelileriniń retsiz júrgizilgeni aıtyldy.
Medeý aýdanynyń ákimi Erkebulan Orazalın laı kóshkinine qatysty túsinikteme berip, jeke sektordyń kommýnıkatsııalarǵa qosylýy retsiz ári qaýipti ekenin málimdedi. Onda kóptegen taratý jelisi standarttarǵa sáıkes kelmeıdi.
«Osy máseleni sheshý úshin byltyrdan bastap taratý jelilerin salý boıynsha jobany ázirleýge kirisken edik. Biz „Balqash“ sý kózin kórsettik. Jańa skvajınalar — bul birinshi kezeń. Ekinshi kezeń — taratý jelilerin júrgizý jáne sý qubyrymen qatar káriz jelilerin salý. Óıtkeni taýly jerlerde septıkterdi paıdalanatyn jeke úıler qaýipsiz emes», — deıdi aýdan basshysy.
Almaty ákiminiń tapsyrmasy boıynsha otbasynyń barlyq múshelerin jerleýdi uıymdastyrý úshin kómek kórsetiledi.
Qaza bolǵan otbasynyń úlken uly stýdent. Qazir ol elden tys jerde oqyp jatyr. Elge oralǵan soń oǵan bilim alýyna jáne ómir súrýine materıaldyq qoldaý kórsetiletin bolady.
