Almatydaǵy qutqarý qyzmeti qysqy maýsymǵa daıyn ba
ALMATY. KAZINFORM – Almaty qutqarý qyzmeti qysqy maýsymǵa qanshalyqty daıyn? Kazinform tilshisi osy suraqtyń jaýabyn anyqtap kórdi.
Bıyl qyrkúıek aıynda Almaty qutqarý qyzmetiniń qutqarýshylary 12 jyl bolǵan bertsterdi kıip júrgeni týraly beınejazba tarady.
Ol kezde qala ákimdigi qysqy kezeńge daıyndyq sheńberinde qysqy berts jáne taý etikterin satyp alý boıynsha konkýrstyq rásimder endi júrgiziletin habarlaǵan bolatyn.
Osy oraıda, Kazinform tilshisi jaýapty mekemege taǵy da saýal joldap, qutqarýshylardyń qysqy kıimdermen qanshalyqty qamtamasyz etilgenin surady.
Seısmıkalyq qaýipsizdik jáne jumyldyrý daıyndyǵy basqarmasyna qarasty Almaty qalasynyń qutqarý qyzmeti qysqy kıimder (kýrtka, sýyqtan qorǵaýǵa arnalǵan keýdeshe, shalbarlar, bas kıimder) jáne berts 2023 jyly satyp alynǵanyn habarlady.
– Arnaıy normalarǵa sáıkes kıim eki jyl merzimge beriledi. Kıimderdi kelesi satyp alý rásimi 2025 jyly ótedi. 2024 jyly taýda jumys isteıtin qutqarýshylarǵa arnalǵan alpınıstik qural-jabdyqtar satyp alyndy: trekıngtik botınkalar, sýyqtan qorǵaýǵa arnalǵan kýrtka, jelden qorǵaıtyn kýrtka, jelden qorǵaıtyn shalbar, mamyq jılet, 50 jıyntyq sanyndaǵy sýyqtan qorǵaıtyn termo kıimder, - dep habarlady mekemeden.
Sondaı-aq Almaty qutqarý qyzmetiniń jaýabyna sáıkes, 2024 jyly taýǵa kııýge arnalǵan jáne trekıngtik botınkalardy satyp alýǵa 61 mıllıon 698 myń teńge somasynda qarajat bólingen.
Eske salaıyq, buǵan deıin Almatyda eki negizgi qutqarý jasaǵy – Respýblıkalyq jedel-qutqarý jasaǵy (RJQJ) jáne Almaty qutqarý qyzmeti jumys isteıtinin jazǵanbyz.
