Almatydaǵy krematorıı Densaýlyq saqtaý basqarmasyna berildi
ALMATY. KAZINFORM – Almatyda birneshe jyldan beri ashylmaı turǵan krematorıı bolashaǵy qandaı bolmaq? Kazinform tilshisi anyqtap kórdi.
Almaty ákimdigi 2020 jyly krematorııdiń jobalyq-smetalyq qujattamasyn jasaýǵa tender jarııalady.
Ǵımarattyń qurylysy 2021 jyldyń jeltoqsan aıynda aıaqtalsa da, 2022-2023 jyldardyń aralyǵynda nysannyń ashylý qaıta-qaıta shegerildi.
2024-2025 jyldardyń aralyǵynda krematorııdi qaraýyna alatyn vedomstvonyń anyqtalmaýynan ǵımarat taǵy da iske qosylmady.
Májilis depýtaty Sergeı Ponomarev bıýdjetten 1,5 mlrd teńge jumsap salynǵan krematorıı Densaýlyq saqtaý mınıstrligine kerek bolmaı qalǵanyn aıtty.
Kazinform agenttigi krematorııdiń bolashaǵyn naqtylaý úshin qaıtadan Almaty ákimdigine júgindi. Resmı saýalǵa qalalyq qoǵamdyq densaýlyq saqtaý basqarmasy jaýap berdi.
Vedomstvo málimetine sáıkes, QR Premer-mınıstriniń 2025 jylǵy 3 shildedegi tapsyrmasyn oryndaý maqsatynda krematorııdi Almaty qalasynyń qoǵamdyq densaýlyq saqtaý basqarmasynyń «Qalalyq patologoanatomııalyq bıýro» kásipornyna berý týraly sheshim qabyldanǵan.
– 2025 jyldyń 17 qazanynda Qoǵamdyq densaýlyq saqtaý basqarmasynyń «Qalalyq patologoanatomııalyq bıýrosy» múlikti qabyldap aldy. Qazirgi ýaqyta Almaty qalasy ákimdiginiń «Almaty qalasyndaǵy kommýnaldyq menshiginiń keıbir máseleleri týraly» qaýlysy «Azamattarǵa arnalǵan úkimet» memlekettik korporatsııasynyń fılıalynda tirkelýde, - delingen basqarma jaýabynda.
Sondaı-aq vedomstvo barlyq rásimder qazan aıynyń sońyna deıin aıaqtaýly tıis ekenin málimdedi. Alaıda krematorıı ǵımaratynyń qashan iske qosylatyny týraly naqty habarlaǵan joq.
Eske salaıyq, byltyr Almaty ákimdigi krematorıı qurylysyn belgilengen merzimde jáne tolyq aıaqtamaǵany úshin merdiger kompanııadan sot arqyly 2,7 mln teńge óndirip aldy.