Almatydaǵy krematorıı jaqyn kúnderi jumysyn bastaıdy
ALMATY. KAZINFORM — Almatynyń qoǵamdyq densaýlyq saqtaý basqarmasy krematorııdiń jaqyn kúnderi iske qosylatynyn habarlady.
Vedomstvonyń málimetinshe, 9 qańtarda Qazaqstan Respýblıkasy Ádilet mınıstrliginde QR Ulttyq ekonomıka mınıstrliginiń jerleý jáne qabirlerdi qarap-kútý isin uıymdastyrýdyń úlgilik qaǵıdalaryna ózgerister engizýdi kózdeıtin buıryǵy tirkelgen.
— Qabyldanǵan ózgerister krematorıılerdiń qyzmetine quqyqtyq negiz qalyptastyryp, Qazaqstan aýmaǵynda krematsııa rásimin alǵash ret zańnamalyq deńgeıde júrgizýge múmkindik beredi. Atalǵan buıryq kúshine engennen keıin Almatydaǵy krematorıı óz jumysyn bastap, sanıtarlyq jáne quqyqtyq talaptardy saqtaı otyryp, belgilengen tártipte qyzmet kórsetedi, — delingen habarlamada.
Sonymen qatar Almaty patologoanatomııalyq bıýrosynyń baqylaý keńesi qazirgi ýaqytta krematsııa qyzmetteriniń baǵa tizimin bekitip jatyr.
Qyzmet tarıfteri men kórsetý tártibi týraly aqparat Almaty patologoanatomııalyq bıýrosynyń resmı saıtynda qosymsha jarııalanady.
Eske salaıyq, Almaty ákimdigi 2020 jyly krematorııdiń jobalyq-smetalyq qujattamasyn jasaýǵa tender jarııalady.
Ǵımarattyń qurylysy 2021 jyldyń jeltoqsan aıynda aıaqtalsa da, 2022-2023 jyldardyń aralyǵynda nysannyń ashylýy qaıta-qaıta shegerildi.
2024-2025 jyldardyń aralyǵynda krematorııdi qaraýyna alatyn vedomstvonyń anyqtalmaýynan ǵımarat taǵy da iske qosylmady.
Májilis depýtaty Sergeı Ponomarev bıýdjetten 1,5 mlrd teńge jumsap salynǵan krematorıı Densaýlyq saqtaý mınıstrligine kerek bolmaı qalǵanyn aıtty.
Al Almaty ákimdigi krematorıı qurylysyn júrgizgen merdigerdi sotqa bergen edi.