Almatydaǵy krematorıı nelikten áli ashylmaı tur
ALMATY. KAZINFORM — Qurylysy 2021 jyly aıaqtalǵan krematorıı nelikten ashylmaı tur. Kazinform tilshisi mán-jaıyn anyqtady.
Almaty ákimdigi 2020 jyly krematorııdiń jobalyq-smetalyq qujattamasyn jasaýǵa tender jarııalady.
Ǵımarattyń qurylysy 2021 jyly aıaqtaldy. Alaıda nysannyń ashylý 2022 jylǵa, sosyn 2023 jyldyń birinshi toqsanyna, odan keıin 2023 jyldyń ekinshi toqsanyna shegerildi.
Byltyr Almaty ákimdigi krematorıı qurylysyn júrgizgen merdigerdi sotqa berdi. Sot sheshimimen «TarazKurylysInvest» JShS memlekettik satyp alýdyń jaýapsyz qatysýshysy dep tanylyp, jergilikti bıýdjetke 2 775 414,62 teńge qaıtaryldy.
Agenttik saýalyna jaýap bergen Almaty qalasynyń qurylys basqarmasy nysan búgingi kúni basqarma teńgeriminde ekenin habarlady. Resmı jaýapqa sáıkes, qazirgi ýaqytta «TarazQurylysInvest» JShS krematorııdiń ınjenerlik jelilerin salý boıynsha qurylys-montajdaý jumystaryn tolyq kólemde aıaqtaǵan jáne obektini paıdalanýǵa berý aktisine qol qoıylǵan.
— Sáýlet jáne ádilet organdarynda tirkeý 2024 jyldyń úshinshi toqsanynda ótkizildi. Qazirgi ýaqytta Almaty qalasynyń ákimdigi Qazaqstan Respýblıkasynyń Ádilet mınıstrligi men Densaýlyq saqtaý mınıstrligine osy obektiniń túpkilikti teńgerim ustaýshysyn aıqyndaý qajettigi týraly hat joldady, — delingen basqarma jaýabynda.
Eske salaıyq, buǵan deıin Qazaqstanǵa krematorıı qurylysy ne úshin qajet ekenin Ádilet mınıstrligi túsindirgen edi.