Almatydaǵy krematorıı qyzmetiniń baǵasy bekitildi me
ALMATY. KAZINFORM — Almatyda elimizdegi alǵashqy krematorıı qyzmetiniń baǵasy týraly aqparatqa túsinikteme berdi.
Áleýmettik jelilerde krematsııalaý baǵasy — qujattardy rásimdeý, tasymaldaý jáne kúlge arnalǵan qutyny qosqanda 250 myńnan 460 myń teńgege deıin bolatyny týraly aqparat tarady. Boljam boıynsha ortasha baǵa 260–280 myń teńge ekeni aıtylǵan.
Jaǵdaıdy naqtylaý úshin agenttik Almatynyń qoǵamdyq densaýlyq saqtaý basqarmasyna júgindi.
Vedomstvo ókilderi Qalalyq patologoanatomııalyq bıýrosymen (QPAB) birge áli de krematorııdi iske qosý jumystary júrgizilip jatqanyn habarlady. Onyń ishine baǵalar preıskýrantyn daıyndaý, mekeme jumysynyń ishki erejelerin jáne QPAB tikeleı ázirleıtin basqa da normatıvtik qujattardy jasaý jumystary bar.
— Krematsııa quny QPAB-tyń tikeleı jáne janama shyǵyndaryna, sondaı-aq boljamdy tabysqa baılanysty esepteledi, — dep jaýap berdi vedomstvo basshysynyń orynbasary Ermek Tájimurat.
Sondaı-aq ol krematorıı qyzmetteriniń tizbegi aıqyndalyp, onyń quny boıynsha esep júrgizilgenin jáne qujattar bekitý satysynda turǵanyn atap ótti.
Degenmen, krematorııdiń qashan naqty iske qosylatyny ázirge belgisiz. Mekeme uıymdastyrý protsedýralary aıaqtalyp, qajetti normatıvtik-quqyqtyq baza qalyptasqannan keıin jumys isteı bastaıdy.
Eske salaıyq, Almaty ákimdigi 2020 jyly krematorııdiń jobalyq-smetalyq qujattamasyn jasaýǵa tender jarııalady.
Ǵımarattyń qurylysy 2021 jyldyń jeltoqsan aıynda aıaqtalsa da, 2022-2023 jyldardyń aralyǵynda nysannyń ashylýy qaıta-qaıta shegerildi. 2024-2025 jyldardyń aralyǵynda krematorııdi qaraýyna alatyn vedomstvonyń anyqtalmaýynan ǵımarat taǵy da iske qosylmady.
Keıin nysandy qoǵamdyq densaýlyq saqtaý basqarmasynyń Qalalyq patologoanatomııalyq bıýrosy qabyldap, jaqynda ashylatyny belgili boldy.