Almatydaǵy kóterme bazarda myńnan astam zań buzý deregi anyqtaldy
ALMATY. KAZINFORM – Almatydaǵy eń iri kóterme saýda oryndarynyń biri «Barys-4» bazarynda keshendi baqylaý sharalary júrgizildi.
Qala ákimdiginiń málimetinshe, baqylaý barysynda áleýmettik mańyzy bar azyq-túlik taýarlaryna belgilengen saýda ústemesiniń saqtalýyna, baǵa belgileý tártibine, taýarlarda baǵa kórsetkishteriniń bolýyna jáne ónimsiz deldaldy anyqtaýǵa basymdyq berildi.
– Sonymen qatar kásipkerlerge saýda salasyndaǵy zańnama talaptaryn saqtaý, baǵa kórsetkishterin durys rásimdeý jáne belgilengen saýda ústemesin qoldaný máselesi boıynsha túsindirý jumystary júrgizildi, - delingen habarlamada.
Tekserý nátıjesinde zań talaptaryn buzǵan kásipkerler ákimshilik jaýapkershilikke tartyldy. Jalpy 1 025 ákimshilik hattama toltyryldy. Onyń ishinde 717-si taýar baǵasyn teńgemen kórsetpegeni úshin, al 308-i áleýmettik mańyzy bar azyq-túlik taýarlaryna belgilengen 15 paıyzdyq saýda ústemesin asyrǵany úshin rásimdeldi. Salynǵan aıyppuldardyń jalpy somasy 25 mıllıon teńgeden asty.
Budan bólek, óńirlik komıssııanyń jumysy barysynda 18 ónimsiz deldal anyqtalyp, olardyń qyzmeti toqtatyldy.
Saýda salasyndaǵy zańnamanyń saqtalýyn baqylaý jáne áleýmettik mańyzy bar azyq-túlik taýarlary baǵasynyń negizsiz ósýine jol bermeý baǵytyndaǵy tekserý jumystary aldaǵy ýaqytta da jalǵasady.
Eske salaıyq, buǵan deıin elimizde bazarlardy tekserý kezinde 247 kásipkerdiń tabysyn jasyrý áreketi anyqtalǵanyn habarlaǵanbyz.
