Almatydaǵy qonaqúı birneshe kún qonyp alyp aqysyn tólemegen óskemendikti sotqa berdi
ÓSKEMEN. KAZINFORM – Almaty qalasyndaǵy qonaqúı birneshe kún qonyp alyp aqysyn tólemegen óskemendikti sotqa berip, jeńip shyqty.
ShQO soty baspasóz qyzmetiniń málimetine súıensek, ótken jyldyń shilde aıynda «Booking» júıesi arqyly beımálim Germanııa azamaty Almatydaǵy qonaqúıde 2024 jyldyń 30 shildesi men 8 tamyzy aralyǵynda turýǵa bron jasaǵan. Aqsha sol adamnyń kartasynan tólengen.
Qonaqúıge shynymen de bir adam kelip, osy kúnderi turdy. Biraq 2024 jyldyń 14 qazanynda bank kartasynyń ıesi tranzaktsııa alaıaqtarǵa jasaldy dep kórsetip, qonaq úıdiń shotyna túsken somany qaıtaryp alǵan.
— Qonaqúı ákimshiligi bul adamnyń Óskemen turǵyny ekenin anyqtap, odan 429 300 teńge óndirý týraly sotqa talap aryz túsirdi. Sot barysynda jaýapker qonaqúıde turǵanyn moıyndamaı, sol ýaqytta Óskemende bolǵanyn alǵa tartty. Alaıda sotta usynylǵan dáleldemeler onyń qonaqúıde bolǵanyn rastady. Aıǵaqtardy kórgende jaýapker kinásin moıyndap, isti medıatsııa tártibimen aıaqtaýdy usyndy, — delingen aqparatta.
Osylaısha, jaýapker qonaqúıdiń aqshasyn bólip tóleıtin boldy.
Eske salsaq, osyǵan deıin BQO-da sot talaptaryn oryndamaǵan departamentke shara qoldanylǵany habarlanǵan.