Almatydaǵy qonaq úıler Bakýmen salystyrǵanda 3,5 ese az – Investorlarǵa jańa kredıt berilmek

ASTANA. KAZINFORM – Almaty qalasynyń ákimi Erbolat Dosaev qalanyń týrıstik áleýetin tejep otyrǵan negizgi faktorlardy aıtyp berdi. Atap aıtqanda, bul – nómirlik qordyń shektelýi jáne MICE jáne EVENT týrızmin damytý úshin mamandanǵan ınfraqurylymnyń bolmaýy.

«Almaty qalasynda búginde 11 400 nómiri bar 354 qonaq úı júmys isteıdi. Bul Bakýmen salystyrǵanda 3,5 ese, Tblısıden – 2,7 ese, Tashkentten – 2 ese tómen. Osyǵan baılanysty jańa qonaq úıler qurylysyna erekshe nazar aýdaryp otyrmyz», - E.Dosaev Úkimettiń búgingi otyrysynda.

Investorlardy yntalandyrý maqsatynda «Báıterek» ulttyq qory men Almaty ÁKK jelisi boıynsha «Almaty tourism» jańa kredıttik ónimi arqyly týrıstik sala jobalaryn jeńildikpen qarjylandyrý baǵdarlamasy iske asyrylyp jatyr.

Búgingi tańda megapolıste ınvestorlar 227 mlrd teńgege 3,3 myń nómir bolatyn 7 qonaq úı salyp jatyr, 16 qonaq úıdi jobalady. Atalǵan sharalar úsh jyl ishinde nómirlik qordy 17 myń nómirge deıin 1,5 ese ulǵaıtýǵa múmkindik beredi.

«Týrıstik qyzmetter eksportyn arttyrý maqsatynda Almaty qalasy joǵary áleýetke ıe MICE jáne EVENT týrızmin belsendi damytýda. Alaıda Respýblıka saraıy, Atakent sekildi mamandandyrylǵan nysandardyń tozýyna, halyqaralyq kórme standarttaryna sáıkes kelmeýine baılanysty qala kópfýnktsııaly kórmelik jáne kontsert jáne is-shara alańdary retinde tanyla almaıdy. Al bul Almatynyń týrıstik áleýetin tolyq ashýǵa múmkindik bermeıdi», - dep atap ótti ákim.

Osy oraıda qalada 8,5-12 myń orynǵa Freedom Hall, myń orynǵa Swissotel Grand Hall nysandary jobalanyp jatyr.