Almatydaǵy kompanııalar jalaqy boıynsha 130 mln teńgeden astam bereshegin ótedi
ALMATY. KAZINFORM – Almatyda bıyl aıdyń ishinde 240-tan astam jumysshy ózine tıesili jalaqysyn qaıta aldy. Qala kásiporyndary qyzmetkerlerine jalpy 130,7 mıllıon teńge bereshegin ótegen.
Bul týraly Óńirlik kommýnıkatsııalar qyzmetinde ótken baspasóz konferentsııasynda Almaty eńbek ınspektsııasy departamentiniń basshysy Serik Orazbekov málimdedi.
Bıylǵy qańtar-qyrkúıek aılarynda eńbek ınspektorlary 634 tekserý júrgizip, 638 zań buzýshylyqty anyqtaǵan. Onyń ishinde 603-i eńbek qatynastaryna, 34-i eńbek qaýipsizdigine, bir jaǵdaı jumyspen qamtý salasyna qatysty boldy.
Jumys berýshilerge 414 nusqama berilip, olardyń 97%-dan astamy oryndalǵan. Sondaı-aq 335 uıym men kásipkerge 62,8 mıllıon teńge aıyppul salynyp, onyń 44,4 mıllıony óndirildi.
Mysaly, «Kazelektroprıvod» JShS 27 qyzmetkerge 24,4 mln teńge, al bankrot bolǵan «DK Kardınal» JShS 35 adamǵa 41,1 mln teńge jalaqy tólegen.
Serik Orazbekovtyń aıtýynsha, aldaǵy ýaqytta eńbek qatynastarynyń ashyqtyǵyn arttyrý úshin zańnamaǵa ózgerister engizilip jatyr.
– Eger eńbek sharty Biryńǵaı elektrondyq júıege engizilmese, aıyppul salynady. Sondyqtan jumys berýshilerge osy máseleni nazarǵa alý qajet, - dedi ol.
Jyl basynan beri eńbek ınspektsııasyna 5 myńnan astam ótinish túsken. Mamandar 7 kezdesý ótkizip, 400-den asa adamǵa eńbek quqyǵy boıynsha keńes bergen.
Eske salaıyq, buǵan deıin Atyraýdaǵy №8 «Aqbota» sanatorıı-bóbekjaı-balabaqshasynyń 70-ten asa qyzmetkerine shilde aıynan beri aılyq tólenbeginin jazǵanbyz. Mindetti áleýmettik medıtsınalyq saqtandyrý qoryndaǵy shottaryna da aqsha túspegen.