Almatydaǵy kólik keptelisin retteý: Qaladan shyǵa beriste jańa jol ótkeli salynady
ALMATY. KAZINFORM –Almatydan oblysqa shyǵatyn jolda kún saıyn shaqyrymǵa sozylatyn kólik keptelisi baıqalady. Olardy retteý úshin ákimdik qandaı sharalardy qolǵa alyp jatyr. Kazinform agenttiginiń tilshisi anyqtap kórdi.
Adamdar keshke Almatydan oblysqa shyǵý úshin, tańerteń qalaǵa kirý úshin saǵattap kólik keptelesinde turady. Bunyń ózekti máselege aınalǵaly biraz jyl boldy.
Kólik keptelisi tek «Altyn-Orda» bazary aýmaǵynda jáne Talǵar baǵytynda ǵana emes, sonymen qatar megapolıske aparatyn shyǵys, batys jáne soltústik baǵyttaǵy negizgi joldarda baıqalady.
Almaty oblysynyń jolaýshylar kóligi jáne avtomobıl joldary basqarmasy kólik keptelisi máselesin sheshýge baǵyttalǵan sharalar týraly maǵlumat berdi.
Alataý qalasyna qaraı jol ótkeli salynady
Vedomstvonyń habarlaýynsha, jobalyq-smetalyq qujattama ázirlenip, memlekettik saraptamadan ótti. Qazir Almaty oblysy Іle aýdany (DAMÝ aýdany) 6,8 shaqyrymynda «Almaty-Jetigen-Qapshaǵaı» sý qoımasy jolynyń boıynda jol ótkeliniń qurylysyna jer telimderin alyp qoıý jumystary júrgizilip jatyr. Eger bıýdjetten qarjy bólinse, qurylys jumystary 2025 jylǵa josparlanǵan.
Jol ótkeli - kólik qozǵalysynyń negizgi joly retinde qarastyrylady. Joba aıasynda qoldanystaǵy joldyń eni 11 metrden 12 metrge deıin ózgeredi jáne eki jolaqtan turady. Ár baǵytta bir jolaqtyń eni 3,75 metr.
Jol ótkeliniń jobasy boıynsha eni 3,75 metrlik eki baǵyt bolady. Ár baǵytta eni 1 metrlik qaýipsizdik jolaǵy jáne jol baǵyttaryn bólip turatyn jolaqta qorshaý ornatylady. Jol baǵyttaryn bólip turatyn jolaqtyń eni metall kedergi qorshaýlardy ornatý úshin 3 metr bolady. Al jolaýshylarǵa arnalǵan joldyń eni eki jaǵynan da 1,5 metrge jetedi.
Joldy keńeıtý
Sondaı-aq, «Vınosovhoz – Chapaev» jol ýchaskesin (0,5-0,8 km, Aşybulaq aınalma joly) qaıta jańartýdyń jobalyq-smetalyq qujattamasy memlekettik saraptamaǵa joldandy. Jobada keńeıtilgen jol bóligi,qosymsha shyǵatyn joldar jáne baǵdarsham qıylysyn ornatý qarastyrylǵan. Qaıta qurý jumystaryn bıýdjet qarajaty bólingen jaǵdaıda 2025 jyly bastaý josparlanyp otyr.
Kóshelerdi uzartý
Almaty aglomeratsııasy aıasynda QR Prezıdentiniń tapsyrmasyna sáıkes Almaty oblysynyń aýmaǵy arqyly alty radıaldy kósheniń qurylysy júrgizilip jatyr. Onyń ishinde Abaı, Rysqulov, Aqyn Sara, Saın, Tilendıev jáne Soltústik aınalma kósheleri bar.
– Bul jobanyń negizgi maqsaty – kólik ınfraqurylymyn jaqsartý, jol jelileriniń qoljetimdiligi men sapasyn arttyrý, azamattardyń jol júrý ýaqytyn qysqartý. Joba kólik aǵyndaryn ońtaılandyrý jáne ekologııalyq taza tehnologııalardy engizý arqyly jyldamyraq jáne yńǵaıly baǵyttardy qurýǵa, aýanyń lastanýyn azaıtýǵa baǵyttalǵan. Sondaı-aq, jol qozǵalysy qaýipsizdigin arttyrýǵa erekshe kóńil bólinip otyr. Bul jol-kólik apattaryn azaıtyp, júrgizýshiler men jaıaý júrginshiler úshin jaǵdaı týǵyzady, – dep atap ótti oblystyq jolaýshylar kóligi jáne avtomobıl joldary basqarmasynan.
Qalanyń basqa bólikteri
Vedomstvo avtomobıl joldary komıteti QR Ulttyq ekonomıka mınıstrligine Talǵar, Esik jáne Qaskeleń qalalaryn Almaty qalasymen (Almaty-Talǵar – Esik - Baıdibek bı - 68 km jáne Almaty-Qaskelen-Ushqonyr-Uzynaǵash — 84 km) baılanystyratyn baǵyttarda jol ınfraqurylymyn keńeıtý jáne jaqsartý jobasy boıynsha ekonomıkalyq qorytyndy alý úshin ınvestıtsııalyq usynys jasaǵanyn málimdedi.
Ulttyq ekonomıka mınıstrliginen kelisim alǵannan keıin jobalyq-smetalyq qujattamany ázirleýge qarajat bólý máselesi respýblıkalyq bıýdjet komıssııasynyń qaraýyna shyǵarylady.
Almatyǵa alys-jaqyn mańdaǵy aýyldardan kóligimen ne qoǵamdyq kólikpen qatynap jumys isteıtin adamdar az emes. Megapolıske árkim ártúrli jolmen kelse de, báriniń shaǵymy bir, ol — saǵattap ýaqyt alatyn keptelis.
Osyǵan deıin Kazinform tilshisi Uzynaǵashqa shyǵatyn jolda bolatyn keptelis máselesimen tanysyp qaıtqan bolatyn.
Bul turǵyndar kepteliske shaǵymdanatyn jalǵyz tasjol emes. Kólik ıeleri 2021 jyldyń aıaǵynda jańa jolaıryǵynyń paıdalanýǵa berilgenine qaramastan, Almatynyń batys shyǵysynda, ásirese, «Altyn Orda» bazary men «Aport» saýda ortalyǵy mańynda birneshe shaqyrymǵa sozylatyn keptelis kúnde baıqalatynyn aıtady.
Eske salaıyq, 2021 jyly «Altyn orda» bazary mańyndaǵy «Almaty-Raıymbek» ýchaskesinde jańa bas magıstraldyq estakada paıdalanýǵa berilgen bolatyn.
Sondaı-aq «Almaty-Talǵar» tasjolynyń keńeıtiletinin jazǵan edik.