Almatydaǵy Kókjaılaý kýrorty boıynsha qoǵamdyq tyńdaýlar qashan ótedi
ALMATY. KAZINFORM — Almaty mańyndaǵy taýly aımaqta Almaty Super Ski taý-shańǵy kýrorty 2028 jyldyń sońyna qaraı ashylmaq. Qurylysty 2026 jyly bastaý josparlanǵan. Bul týraly Týrızm jáne sport mınıstrliginiń alqa otyrysynda Kazakh Tourism Development basshysy Erjan Erkinbaev málimdedi.
Jańa kýrort Almatynyń taý bókterin qamtıdy. Joba aıasynda 60 shaqyrym taý-shańǵy trassasy, 16 aspaly jol salynady. Keshenniń ótkizý qabileti táýligine 10 myńnan astam shańǵyshyny qabyldaýǵa jetetindeı jobalanǵan.
Erjan Erkinbaevtyń aıtýynsha, jobaǵa álemniń jetekshi sheteldik kompanııalary tartylǵan.
— Bıyl sáýirde qoǵamdyq tyńdaýlardy ótkizýdi, shildede qurylysty bastaýdy jáne kýrortty 2028 jyldyń jeltoqsanynda iske qosýdy josparlap otyrmyz. Kókjaılaýdaǵy kýrorttyń jańa nusqasynda erekshe qorǵalatyn tabıǵı aýmaq jerleri qoldanylmaıdy, sondaı-aq jeke kottedjder men vıllalar salýǵa qatań tyıym salynady. Taý-shańǵy kýrorty Іle-Alataýy ulttyq parkiniń aýmaǵynda ornalasady. Jalpy aýmaǵy 1 000 gektar bolsa, sonyń tek 20 gektary qonaqúı, jalǵa berý oryndary, qoǵamdyq tamaqtaný jáne ózge de ınfraqurylymǵa bólinedi, — dedi Erkinbaev.
Onyń sózinshe, joba aıasynda taý-shańǵy trassalaryn jobalaý, jasandy qar júıelerin ornatý jáne jasandy kólder salý boıynsha keńesshiler tartý kózdelgen. Sonymen qatar kóshkin men opyrylysqa qarsy qosymsha qaýipsizdik sharalary da ázirlenip jatyr.
— Aýa raıyna táýeldi bolmaımyz: trassalardyń 70%-yna jasandy qar júıesi ornatylady. Sonymen birge trassalardyń 70%-y «jasyl» jáne «kók» sanatynda bolady, ıaǵnı endi ǵana syraǵanaýdy bastaǵan shańǵyshylar men áýesqoılarǵa arnalǵan, — dedi ol.
Erkinbaev jańa kýrorttyń el jáne qala bıýdjeti úshin eleýli ekonomıkalyq tıimdilik ákeletinin de aıtty.
Sarapshylardyń baǵalaýynsha, joba iske asqanda kýrort jyl boıy jumys isteıtin nysanǵa aınalady. Onyń áleýeti jylyna 2,4 mln shańǵyshy men 6,4 mln jaıaý týrısti qabyldaýǵa jetedi. Jylyna shamamen 8,9 mln adam kelýi múmkin.
— Kótergishke bılet alǵan árbir týrıst qosymsha shyǵyn jasaıdy: 1 dollar bılettiń ózinen tys, shamamen 5 dollardy qural-jabdyq jalǵa alý, nusqaýshy qyzmeti men turýǵa jumsaıdy, al 15 dollardy meıramhanalar, mýzeıler, teatrlar jáne basqa da demalys túrlerine beredi. Bir týrıst kýrortta kúnine orta eseppen 300 dollar jumsap, úsh kún aıaldasa, ekonomıkaǵa jyl saıyn shamamen 1 mlrd dollar tikeleı kiris ákelýi múmkin, — dedi Erkinbaev.
Eske salaıyq, buǵan deıin Almaty taý klasterinde qosymsha 30 arqanjol, 161 shaqyrym shańǵy jolaǵy paıda bolatynyn habarlaǵanbyz.