Almatydaǵy Kóktóbe telemunarasy týrıster úshin ashyla ma
ALMATY. KAZINFORM – «Qazteleradıo» AQ Almatydaǵy strategııalyq nysan bolyp esepteletin Kóktóbe telemunarasyn týrıster úshin ashylatyny ne ashylmaıtyny jóninde túsinik berdi.
Buǵan deıin áleýmettik jelilerde Kóktóbe telemunarasy týrısterge ashylady degen aqparat taraǵan edi. Osyǵan baılanysty redaktsııa «Qazteleradıo» AQ-na habarlasyp, telemunaraǵa qatysty jaǵdaıdy túsindirýdi surady.
Kompanııa málimetinshe, telemunara – ulttyq habar taratý jelisiniń strategııalyq mańyzy bar negizgi nysandarynyń biri. Bul jerden 21 telarna men 23 radıoarnanyń taratylymy júrgiziledi.
«Qazteleradıo» AQ basqarma tóraǵasy Rýıslam Nurdáýlet telemunara Qazaqstannyń terrorızmge qarsy zańnamasyna sáıkes terrorıstik turǵydan osal nysan retinde tirkelgenin atap ótti.
– Mundaı sanattaǵy nysandarda bógde adamdardyń júrýine, ekskýrsııalardy, týrıstik, mádenı ne oıyn-saýyq sharalaryn ótkizýge qatań tyıym salynady. Sonymen qatar zańnama men Qoǵam Jarǵysynyń talaptaryna saı ulttyq operatordyń týrızm nemese oıyn-saýyq salasynda kásipkerlikpen aınalysýyna, negizgi qyzmetine qatysy joq tabys tabýyna ruqsat joq, - dedi ol.
Onyń aıtýynsha, telemunaranyń basqa maqsattarǵa beıimdelýi týraly kez kelgen talqylaý tek memlekettik organdar deńgeıinde júrgizilýi múmkin jáne barlyq qaýipsizdik talaby tolyq saqtalýǵa tıis. Al buǵan deıin jýrnalıster men blogerler tek ýákiletti qurylymdardyń kelisimimen ǵana nysanǵa bara alatyn edi.
Investorlar tarapynan usynys tústi me
Redaktsııa sondaı-aq keı elderdegi tájirıbe boıynsha bıznes ókilderi tarapynan munda baqylaý alańdaryn, kórme keńistikterin nemese kádesyı dúkenderin ashý jaıynda usynystar túsken-túspegenin de surady.
– Telemunaranyń osal nysan mártebesi bar jáne Qoǵam teleradıohabar taratýdan basqa qyzmet túrin atqarýǵa quqyly emes bolǵandyqtan, baqylaý alańdary, dámhana, kádesyı dúkenderi sııaqty týrıstik ınfraqurylym qurý jóninde bıznes tarapynan eshqandaı usynys túsken joq, - dedi Rýıslam Nurdáýlet.
Telemunaranyń tehnıkalyq jaǵdaıy
Ulttyq operator basshysynyń aıtýynsha, telemunara turaqty tehnıkalyq baqylaýda. Josparly aldyn alý jumystary turaqty túrde júrgizilip, metall konstrýktsııalar, ınjenerlik júıeler jáne nysannyń jeke elementteri muqııat tekseriledi.
2024 jyly arnaıy lıtsenzııasy bar uıym telemunara men oǵan irgeles ákimshilik-tehnıkalyq ǵımaratqa keshendi ınjenerlik-seısmıkalyq zertteý júrgizgen. Saraptama nátıjesi boıynsha nysan seısmıkalyq qaýipsizdik talaptaryna tolyq sáıkes keletini jáne ony paıdalaný kezinde eshqandaı qaýip joq ekeni anyqtaldy.
Kóktóbe telemunarasy Almatynyń negizgi kórikti jerleriniń biri sanalady. Teńiz deńgeıinen shamamen 1000 metr bıiktikte ornalasqan, jalpy bıiktigi – 371 metr. Qurylysy 1975-1983 jyldary júrgizilip, 1984 jylǵy 1 maýsymda paıdalanýǵa berildi.
Eske salaıyq, buǵan deıin Almatydaǵy «Kóktóbe» telemunarasynda jaryqtandyrý tehnologııasy qalaı jumys isteıtini týraly jazǵanbyz.