Almatydaǵy Kóktóbe telemunarasy qyzǵylt sary túske kómkerildi

ALMATY. KAZINFORM – Almatyda «Zorlyq-zombylyqqa qarsy 16 kún» atty jahandyq aktsııany qoldaý maqsatynda birqatar nysanǵa jyly qyzǵylt sary tús berildi.

Kóktóbe telemunarasy, Halyk Bank ǵımaraty, Tuńǵysh Prezıdent saıabaǵy, LED-ekrandar jáne qalanyń birneshe iri oryndary qyzǵylt sary túspen árlendi.

– Qyzǵylt sary tús – jylylyqtyń, úmit pen birliktiń belgisi. Ol árbir adamnyń quqyǵyn qorǵaýdyń mańyzyn jáne zorlyq-zombylyqtyń kez kelgen túrine tózbeý qaǵıdatyn eske salady. Bul – qoǵam nazaryn mańyzdy máselege buratyn kórneki belgi ári qıyndyqqa tap bolǵan adamdarǵa degen qoldaý men qurmettiń nyshany, - delingen ákimdiktiń baspasóz qyzmeti taratqan habarlamada.

Eske salaıyq, buǵan deıin Astanada «Zorlyq-zombylyqqa qarsy 16 kún» jahandyq aktsııasyn qoldaý maqsatynda qalanyń birqatar nysanyna qyzǵylt sary tústi jaryq jaǵylǵanyn habarlaǵanbyz.

Al oǵan deıin turmystyq zorlyq-zombylyq kórgender qaıda júgine alatynyn jazǵan edik.