Almatydaǵy qoqys endi GPS-pen baqylanady
ALMATY. KAZINFORM — Almatyda qoqys shyǵarý salasyn tolyq tsıfrlandyrý bastaldy. Qala bıligi arnaıy tehnıkalardy GPS arqyly baqylap, qaldyqtardy tasymaldaýdy biryńǵaı júıege kóshirmek.
Eco Almaty mamandarynyń málimetinshe, qazirgi tańda qoqys shyǵarý uıymdary qyzmet kórsetetin 100 myńnan astam nysan tolyqqandy tsıfrlyq baqylaýsyz jumys isteıdi. Sonymen qatar tarıf quramynda qarastyrylǵan qaldyqtardy suryptaýǵa arnalǵan qarajat qaıta óńdeý júıesine árdaıym tolyq kólemde jetpeıdi. Ruqsat etilmegen qoqys úıindileri men arnaıy tehnıkalardyń tozýy da ózekti máselelerdiń biri bolyp otyr.
Júıeni retke keltirý maqsatynda «Bir aýmaq — bir qoqys shyǵaratyn uıymy» qaǵıdatyn engizý usynylyp jatyr. Bul talaptar halyqqa, turǵyn úı keshenderine, zańdy tulǵalar men jeke kásipkerlerge birdeı qoldanylady.
Sonymen qatar qalada qaldyqtardy tasymaldaýdy baqylaýdyń biryńǵaı júıesi engizilip jatyr. Qazirgi ýaqytta resmı qoqys shyǵarý uıymdarynyń arnaıy tehnıkasynyń 94%-y GPS-platformaǵa qosylǵan. Júıe 20 maýsymǵa deıin tolyq iske qosylady dep josparlanyp otyr.
Mamandardyń aıtýynsha, bul arnaıy tehnıkanyń qozǵalysyn onlaın rejımde baqylaýǵa, qaldyqtardy shyǵarý úderisin qadaǵalaýǵa jáne ekologııalyq talaptardyń buzylýyn anyqtaýǵa múmkindik beredi.
— Polıgondardyń jumysynyń ashyqtyǵyna da erekshe nazar aýdarylyp otyr. Qalada qaldyqtardy tonnamen esepke alý júıesine tolyq kóshý, polıgondardy Biryńǵaı monıtorıng platformasyna qosý jáne tolyqqandy suryptaý jelilerin qurý josparlanǵan, — delingen habarlamada.
Budan bólek, byltyr kólemi 500 myń tonnadan asqan qurylys qaldyqtaryn retteý jumystary jalǵasyp jatyr. Osyǵan baılanysty merdiger jáne qurylys uıymdarynyń arnaıy tehnıkalaryna mindetti GPS-trekerler ornatý, sondaı-aq qurylys qaldyqtaryn ornalastyrý jáne qaıta óńdeýge arnalǵan arnaıy polıgon qurý usynyldy.
Jyl sońyna deıin Almatyda Kóriktendirý qaǵıdalary men Qaldyqtarmen jumys isteý qaǵıdalaryn jańartý, sondaı-aq qaldyqtarmen jumys isteýdiń Biryńǵaı dıspetcherlik ortalyǵyn qurý josparlanyp otyr.
Eske salaıyq, buǵan deıin Almatyda drondar qoqys tastap, túkirgen turǵyndarǵa eskertý jasaıtynyn jazǵanbyz.
