Almatydaǵy Kók bazar jańartylady

«Kók bazardy» modernızatsııalaý bastaldy. Bul týraly qala ákimi Erbolat Dosaev Medeý aýdany turǵyndarymen kezdesýinde aıtty, dep habarlaıdy QazAqparat tilshisi. 

«Jelilerdi rekonstrýktsııalaý, ortalyq kireberistiń aldyndaǵy beton jabyndysyn jańartý, tirek konstrýktsııalaryn kúsheıtý, aýmaqty abattandyrý josparda. Bul jumystar 2024 jyldyń sońyna deıin aıaqtalady», - dedi qala basshysy.

Aıtýynsha, qala turǵyndary men týrıster jıi baratyn tanymal orynnyń biri bolǵandyqtan, modernızatsııa kezinde bazar jabylmaıdy. Jumys shaǵyn aýmaqtarda júrgiziledi. Rekonstrýktsııa shyǵynyn bazar ıesi kóteredi. Sonymen qatar ol qazan aıynda oqýshylar saraıyn modernızatsııalaýdyń ekinshi kezeńi aıaqtalatynyn atap ótti.

«Jańǵyrtý aıasynda jylytý, jeldetý jáne aýany baptaý, sýmen jabdyqtaý jáne káriz júıelerin aýystyrý, jańa transformatorlyq podstantsııa ornatý jumystary júrgizilip jatyr. Jumys qazan aıynyń sońyna deıin aıaqtalady. Sonymen qatar, observatorııada jóndeý jumystary jasalyp, jańa lıft pen teleskop ornatylady. Bul 2023 jyldyń jeltoqsan aıynda bitedi», - dedi ákim.