Almatydaǵy qoǵamdyq kólikterde biryńǵaı jańa tólem júıesi engiziledi
ALMATY. KAZINFORM – Almatyda qoǵamdyq kólikke arnalǵan Avtobys tsıfrlyq jolaqy tóleý júıesin kezeń-kezeńimen engizý bastalady. Bul – Qazaqstan men Qyrǵyzstannyń 24 qalasynda jumys istep turǵan, qoǵamdyq kólikke arnalǵan zamanaýı sheshim.
Júıeni otandyq Innoforce tehnologııalyq holdıngi ázirlegen jáne Almatyda qalalyq kólik júıesin tsıfrlyq basqarýǵa kóshý aıasynda engizilip jatyr.
Almatynyń jol qozǵalysyn uıymdastyrý jáne jolaýshylar kóligi basqarmasynyń habarlaýynsha, Avtobys jolaýshylarǵa jolaqy tóleýdiń yńǵaıly tásil túrlerin usynady. Qala turǵyndary men qonaqtary sapar aqysyn bank kartasymen, kólik kartasymen, sondaı-aq Apple Pay jáne Google Pay arqyly tóleı alady. Sonymen qatar Avtobys mobıldi qosymshasy arqyly QR-kodpen, Bluetooth, NFC nemese kólik nómiri boıynsha, sondaı-aq bank pen uıaly baılanys operatorlarynyń qosymshasy arqyly tólem jasaý múmkindigi bar. Bul qosymsha áreketsiz, úırenshikti ári jyldam tólem ádisin tańdaýǵa múmkindik beredi.
Jeńildik sanatyndaǵy jolaýshylar úshin Avtobys mobıldi qoldanbasynda tarıfti onlaın rásimdeý qarastyrylǵan. Bul keńsege barý men qaǵaz qujattardy rásimdeýdi qajet etpeıdi, sonyń arqasynda qyzmet barynsha yńǵaıly ári qoljetimdi bolady.
– Júıe engizilgen qalalardyń tájirıbesi kólikti tsıfrlandyrý jolaýshylardyń jaılylyǵyn arttyryp qana qoımaı, búkil salanyń tıimdiligin kúsheıtetinin kórsetip otyr. Sapar sanyn esepke alý ashyq bola túsedi, bıletsiz júrý azaıady, baqylaý men marshrýttyq jelini josparlaý jeńildeıdi. Tasymaldaýshylar úshin bul turaqty ekonomıkalyq model, al qala úshin naqty derekterge negizdelgen sheshimder qabyldaý múmkindigi, - delingen habarlamada.
Avtobys – tólem quraly ǵana emes, sonymen qatar tasymaldardy basqarýǵa arnalǵan keshendi tsıfrlyq platforma. Jolaýshylar qoǵamdyq kóliktiń qozǵalysyn naqty ýaqyt rejıminde baqylap, baǵytyn yńǵaıly josparlaı alady. Al tasymaldaýshylar men baqylaý-tekserý qyzmeti eseptiń dáldigin arttyryp, tirkelmegen sapar sanyn azaıtatyn tsıfrlyq quraldardy paıdalanady. Dıspetcherlik qyzmet ár marshrýt boıynsha naqty jaǵdaıdy kórip otyrady, al qala jolaýshylar sany, jeli júktemesi men sýbsıdııalaý qajettiligi jóninde tolyq analıtıkalyq málimet alady.
– Júıeniń basty artyqshylyqtarynyń biri – qarjylyq operatsııalardyń ashyqtyǵy. Tsıfrlyq esep qoǵamdyq kóliktiń naqty jumysyn obektıvti túrde kórsetýge jáne eseptik kórsetkishterge emes, naqty saparlarǵa negizdelgen sýbsıdııalaý modelin qurýǵa múmkindik beredi. Júıeni paıdalaný úshin jolaýshylarǵa Google Play nemese App Store dúkenderinen Avtobys qosymshasyn ornatyp, telefon nómiri arqyly tirkelip, smart-ámııandy toltyrý jetkilikti. Barlyq negizgi fýnktsııa bir qosymshada shoǵyrlanǵan, servıs ortalyqtaryna barý qajet emes, - dep habarlady basqarma.
Almatyda Avtobys júıesin engizý kezeń-kezeńimen júzege asady. Alǵashqy kezeńde júıe marshrýttardyń jekelegen bóliginde iske qosylyp, keıin búkil qalalyq qoǵamdyq kólikke birtindep engiziledi.
Eske salaıyq, Almatyda jolaýshylardyń 49%-y jolaqysyn tólemeıtinin habarlaǵan edik.