Almatydaǵy qyzylshamen aýyrǵandardyń basym bóligi — ekpe almaǵan balalar
ALMATY. KAZINFORM — Almatyda bıyl qyzylshamen aýyrǵan 482 adam tirkeldi.
Almaty sanıtarııalyq-epıdemıologııalyq baqylaý departamenti basshysynyń orynbasary Ásel Qalyqovanyń aıtýynsha, aýrýdyń ósimi byltyrǵy qarashada bastalyp, sol kezde 30 adam tirkeldi. Jeltoqsanda olardyń sany 142-ge deıin jetti. Jyldyń basynan beri ósim jalǵasyp, qazir qyzylshamen aýyrǵan 482 adam tirkelgen.
— Naýqastardyń basym kópshiligi — qyzylshaǵa qarsy ekpe almaǵan balalar. Bul ınfektsııanyń taralyp, aýrý oshaqtarynyń qalyptasýyna tikeleı áser etedi. Sondyqtan ekpe alýdy elemeýge bolmaıdy, — deıdi Ásel Qalyqova.
Aýrýy rastalǵandardyń 451-i, 93,5%-y 14 jasqa deıingi balalar bolyp shyqty. Jasóspirimder — 0,4%, eresekter — 6,01%. 100 myń turǵynǵa shaqqandaǵy syrqattaný kórsetkishi 19,8-ge jetti. Eń kóbi Alataý aýdanynda — 197, Naýryzbaı aýdanynda — 110, Bostandyq aýdanynda — 45, Áýezov aýdanynda — 39, Almaly aýdanynda — 32, Túrksib aýdanynda — 24, Jetisý aýdanynda — 20 jáne Medeý aýdanynda — 15 naýqas tirkelgen.
— Naýqastardyń 87,9%-y qyzylshaǵa qarsy ekpe saldyrtpaǵan. Negizgi sebebi — vaktsınatsııadan bas tartý, medıtsınalyq qarsy kórsetilimder men ekpe jasyna jetpeýi. Bul — halyqtyń aýrýǵa eń beıim toby, — dedi spıker.
Ekpe alǵandar arasynda da qyzylshamen aýyrǵan 34 adam tirkelgen, onyń ishinde 33 adam vaktsınatsııanyń tolyq kýrsyn almaǵan, bireýi ǵana tolyq egilgen. Naýqastardyń eń úlken úlesi — 1 jastan 4 jasqa deıingi balalar men bir jasqa tolmaǵan sábıler.
Infektsııa oshaqtarynyń barlyǵynda epıdemııaǵa qarsy is-sharalar júrgizildi. 4 154 baılanysta bolǵan adam anyqtalyp, olar ınkýbatsııalyq kezeń ishinde medıtsınalyq baqylaýǵa alyndy. Epıdemııalyq kórsetkishter boıynsha qyzylsha, qyzamyq pen parotıtke qarsy baılanysta bolǵan 706 adamǵa vaktsına salyndy. Balabaqshalar men mektepterde súzgilik baqylaý engizilip, kabınette oqytý jaǵy ýaqytsha toqtatyldy, jappaı is-sharalar shektelip, ekpe almaǵan baılanysta bolǵan balalar oqshaýlandy.
Almatyda buryn qyzylshaǵa qarsy ekpe almaǵan 18 jasqa deıingi balalardy qamtıtyn qosymsha ımmýndaý jalǵasyp jatyr. Sondaı-aq 6 aıdan 10 aı 29 kúnge deıingi balalarǵa qosymsha vaktsınatsııa júrgizile bastady. Byltyrǵy jeltoqsannan bıylǵy aqpanǵa deıin 1 720 sábı qamtylyp, bul — josparlanǵandardyń 16,1%-y. Jyl basynan beri qyzylshaǵa qarsy 4 200 bala men jasóspirim ekpe aldy. Josparly vaktsınatsııa eki ret — 1 jasta jáne 6 jasta turǵylyqty jerdegi emhanalarda júrgiziledi.
Eske salaıyq, buǵan deıin Atyraýdaǵy aýrýhanada qyzylshadan em alyp jatqandardyń basym bóligi ekpe saldyrmaǵanyn jazǵanbyz.