Almatydaǵy kınoteatrlar jelisi prodıýserlerden zańsyz tólem talap etken
ASTANA. KAZINFORM — QR Básekelestikti qorǵaý jáne damytý agenttiginiń Almaty qalasy boıynsha departamenti Kinopark — Kinoplexx Theatres kınoteatrlar jelisiniń áreketterinen ústem jaǵdaıdy teris paıdalaný belgilerin anyqtady.
Vedomstvo atap ótkendeı, atalǵan jelide otandyq kınoóndirýshilerge mindetti túrde jarnama bıýdjetin tóleý talaby qoıylǵan, al atalmysh tólem jasalmaǵan jaǵdaıda fılmder kınoteatrlarda kórsetilimge jiberilmegen.
— Mundaı talaptar básekelestikti shektep, naryq sýbektileriniń zańdy quqyqtaryn buzǵan, kınoóndirýshilerdiń kınoprokat naryǵyna kirýine kedergiler jasap, otandyq kınematografııanyń damýyn tejegen. Osyǵan baılanysty Kinopark — Kinoplexx Theatres kompanııasyna Qazaqstan Respýblıkasynyń básekelestikti qorǵaý salasyndaǵy zańnamasyn buzý belgileriniń bar ekendigi týraly habarlama joldandy. Habarlamany qaraý nátıjesinde anyqtalǵan buzýshylyqtar joıyldy. Atap aıtqanda, mindetti jarnamalyq shyǵyndardy júkteý tájirıbesi toqtatylyp, fılmderdi prokatqa shyǵarý úshin talap etilgen «kirý tólemderi» alyp tastaldy, — delingen taratylǵan aqparatta.
Sonymen qatar, habarlamany oryndaý aıasynda qazir fılmderdi relızder kestesine engizýdiń, seanstar kestesin ózgertýdiń, fılmderdiń prokatta bolý merzimderin aıqyndaýdyń, sondaı-aq olardy kórsetilimnen alý sharttarynyń biryńǵaı, ashyq jáne kemsitýsiz tártibin belgileıtin jarııa reglament ázirlenip jatyr.
Qabyldanǵan sharalar naryqtyń barlyq qatysýshy úshin teń jaǵdaılardy qamtamasyz etýge, kınoprokat rásimderiniń ashyqtyǵyn arttyrýǵa jáne otandyq kınoındýstrııanyń damýyna qolaıly orta qalyptastyrýǵa baǵyttalǵan.
Buǵan deıin kınoteatrlar ulttyq fılmderdi kórsetýge qyzyǵýshylyq tanytpaı otyrǵanyn jazǵanbyz.
