Almatydaǵy kepteliske memlekettik qyzmetkerlerdiń jumys ýaqytynyń ózgerýi qalaı áser etti

ALMATY. KAZINFORM – Almatydaǵy memlekettik qyzmetkerler kúzden beri jumys kúnin burynǵydan erterek, saǵat 8:30-da bastap júr. Qalalyq polıtsııa departamentiniń resmı ókili Saltanat Ázirbek bul ózgeristiń joldaǵy jaǵdaıǵa áseri týraly aıtty.

Almaty ákimdigi bıyl qyrkúıekte joldaǵy keptelisti azaıtý úshin birqatar shara qabyldady. Sonyń ishinde jumys kestesin ózgertý jáne keıbir qyzmetkerlerdi qashyqtan jumys isteýge kóshirý de boldy. Buǵan deıin memlekettik organdar saǵat 9:00-de jumysyn bastasa, endi bul ýaqyt 8:30-ǵa aýysty. Sonymen qatar túski úzilis uzaqtyǵy 1 saǵattan 1,5 saǵatqa deıin uzardy.

Jýrnalıster Óńirlik kommýnıkatsııalar qyzmetinde ótken brıfıngte polıtsııa ókilinen bul sharalardyń qaladaǵy jol qozǵalysyna áseri týraly surady.

– Jaǵdaı ózgergen joq, - dep jaýap berdi Saltanat Ázirbek.

Onyń aıtýynsha, joldaǵy kepteliske kóbine jumysqa baratyndar emes, oqýshylar men stýdentterdiń qozǵalysy áser etip otyr. Oqý jyly bastalǵaly kólik sany da kóbeıgen.

Polıtsııanyń málimetinshe, Almatyda 600 myńnan astam kólik tirkelgen, al kún saıyn qalaǵa 400 myńǵa jýyq avtomobıl jaqyn mańdaǵy óńirlerden kelip kiredi. Osylaısha, megapolıstegi joldarda táýligine 1 mıllıonǵa jýyq kólik qozǵalady, bul jol ınfraqurylymyna aıtarlyqtaı salmaq túsiredi.

– Polıtsııa jol qaýipsizdigin qamtamasyz etý úshin barlyq qajetti sharany qabyldap otyr. Tańerteń jáne keshki qarbalas ýaqytta patrýldik ekıpajdar jol qozǵalysyn qolmen basqarady. Bul, ásirese, shyǵys-batys baǵytyndaǵy magıstraldarda asa mańyzdy, - dedi Saltanat Ázirbek.

Eske salaıyq, Almaty ákiminiń qaýlysymen qyrkúıek aıynyń basynda jergilikti atqarýshy organdardyń jumys ýaqyty resmı túrde ózgergen edi. Sonymen qatar ákimdik depýtattardyń bastamasyn qoldap, jeke kompanııa qyzmetkerlerine qashyqtan jumys isteý formatyn engizýdi usyndy. Al joǵary oqý oryndary men kolledjderge sabaqtyń bastalatyn ýaqytyn 8:00 ben 10:00 aralyǵynda ártúrli etip belgileý usynyldy.