Almatydaǵy qaı saıabaqtarda kitaptardy tegin oqýǵa bolady
ALMATY. KAZINFORM – Almatyda bıylǵy 1 maýsymnan bastap jazǵy býkkrossıng alańdary jumys isteı bastaıdy. Bul alańdarda qala turǵyndary men qonaqtary kitaptardy tegin alyp oqyp, ózara almastyra alady.
Almaty mádenıet basqarmasy ókilderiniń málimetinshe, kitap sóreleri Gandı jáne Qarǵaly saıabaqtarynda, M. Maqataev atyndaǵy skverde, sondaı-aq Tsentralnaıa kóshesi, 12B mekenjaıyndaǵy №44 kitaphanada ornalastyrylady.
Al shilde aıynan bastap býkkrossıng alańy Gogol kóshesi, 109 mekenjaıynda ornalasqan A.P. Chehov atyndaǵy Ortalyq qalalyq kitaphanada da ashylady.
Kitap sóreleri dúısenbiden senbige deıin saǵat 10:00-den 17:00-ge deıin jumys isteıdi. Kitap qory turaqty túrde jańartylyp otyrady. Sórelerge kórkem ádebıet, tanymdyq jáne motıvatsııalyq kitaptar qoıylady.
Uıymdastyrýshylardyń aıtýynsha, býkkrossıng formaty turǵyndarǵa taza aýada kitap oqyp qana qoımaı, kitaptaryn ózge oqyrmandarǵa bólisýge de múmkindik beredi.
Eske salaıyq, buǵan deıin Almaty kitaphanalarynyń mobıldi qosymshasy iske qosylǵanyn jazǵan edik.
