Almatydaǵy káriz kollektorynyń qurylysyna baılanysty bir kóshede qozǵalys shekteldi
ALMATY. KAZINFORM — Almatynyń Naýryzbaı aýdanynda Batys káriz kollektory qurylysy jobasynyń kezekti kezeńi bastalady. Osyǵan baılanysty 17 shilde men 30 tamyz aralyǵynda Bekeshev kóshesiniń Ábdildın kóshesinen Beljaılaý kóshesine deıingi bóliginde avtokólik qozǵalysyna ýaqytsha shekteý engiziledi. Bul týraly qalalyq energetıka jáne sýmen jabdyqtaý basqarmasynyń ókilderi aıtty.
Vedomstvonyń habarlaýynsha, joba aıasynda merdiger uıym káriz kollektoryn salý boıynsha qurylys-montaj jumystaryna kirisedi.
— Qurylys jumystary júrgiziletin kezeńde atalǵan ýchaskede qozǵalys jumystardyń oryndalý aımaǵyna qaraı kezeń-kezeńimen shekteledi. Bul turǵyndar men jol qozǵalysyna qatysýshylarǵa keletin qolaısyzdyqty barynsha azaıtýǵa múmkindik beredi, — delingen habarlamada.
Batys káriz kollektory — Almatydaǵy mańyzdy ınfraqurylymdyq jobalardyń biri. Bul nysan paıdalanýǵa berilgennen keıin sý burý júıesiniń senimdiligi artyp, qoldanystaǵy jáne jańadan boı kóterip jatqan turǵyn aýdandardy ortalyqtandyrylǵan káriz jelisine qosýǵa múmkindik týady. Sonymen qatar sanıtarııalyq-epıdemıologııalyq jáne ekologııalyq ahýaldyń jaqsarýyna yqpal etip, qalanyń ınjenerlik ınfraqurylymyn odan ári damytýǵa negiz qalaıdy.
Basqarma ókilderi qala turǵyndary men qonaqtaryna ýaqytsha shekteýge túsinistikpen qarap, ýaqytsha jol belgileriniń talaptaryn saqtaý jáne jol júrý baǵyttaryn aldyn ala josparlaýdy eskertti.
