Almatydaǵy Qarǵaly ózeniniń jasyl túske enýine baılanysty tekserý júrgiziledi

ALMATY. KAZINFORM – QR Ekologııa jáne tabıǵı resýrstar mınıstrligi Almatyda Qarǵaly ózeniniń jasyl túske boıalýyna qatysty túsinikteme berdi.

4 tamyz kúni almatylyqtar Qarǵaly ózeninde sýdyń jasyl túske boıalǵanyn baıqaǵan. Túsin ózgertken ózenniń beınejazbasy áleýmettik jelilerde tarap, turǵyndar tarapynan alańdaýshylyq týdyrdy.

Vedomstvo jaýabyna sáıkes, Almaty qalasy boıynsha Ekologııa departamentiniń mamandary jedel túrde ózen arnasyn tekserý úshin Jandosov kóshesinen bastap «Teploenergetık» saıajaı kooperatıvine deıingi aýmaqqa shyqqan.

– «Alǵabas» yqshamaýdany men «Teploenergetık» saıajaı kooperatıviniń turǵyndarynan alynǵan suhbat nátıjesinde, shamamen kúndizgi saǵat 12:00-de jasyl túske boıalǵany jáne 30 mınýt boıy aǵyp ótkendigi anyqtaldy. Departament mamandary Qarǵaly ózeniniń tómengi aǵysymen júrip ótti. Alaıda tekserý barysynda ózen sýynan kózge kórinerlik jasyl tústi zat anyqtalmady, – delingen mınıstrlik málimdemesinde.

Degenmen, turǵyndar 5 lıtrlik ydysqa sý alyp, ony taldaý úshin departamenttiń analıtıkalyq zerthanasyna tapsyrǵan.

Vedomstvo ókilderi Qarǵaly ózeniniń bastaýy taýǵa jaqyn jerde ornalasqanyn, al onyń aǵysy Almaty qalasynyń birneshe aýdanyn kesip ótetinin atap ótti. Ózen arnasynyń boıynda jeke turǵyn úıler, óndiristik nysandar men bazarlar ornalasqan.

– Jasyl tús tirkelgen aýmaq («Teploenergetık» saıajaı aýdany) Almaty oblysyna kireberiste ornalasqan. Bul jerde ózen shamamen 4–5 shaqyrymǵa sozylatyn ónerkásiptik aımaq arqyly ótedi. Atalǵan aýmaq oblys aýmaǵyna jatady jáne munda ózen arnasyna abattandyrý jumystary júrgizilmegen – ózen tabıǵı arnada aǵady. Sonymen qatar bul jerde túrli ónerkásiptik nysandar ornalasqan, – dep málimdedi mınıstrlikten.

Jasyl tústiń neden paıda bolǵanyn anyqtaý úshin Ekologııa departamenti basqa memlekettik organdarmen birlesip, 5 tamyzdan bastap tekserý jumystaryn bastaıdy.

- Sý quramyna júrgizilgen zerthanalyq taldaýdyń nátıjeleri qosymsha jarııalanatyn bolady, - delingen vedomstvo jaýabynda.

Eske salaıyq, buǵan deıin Almaty ákimdigi kópirden ózenge jasyl tústi hımııalyq zat tógilgen bolýy yqtımal ekenin habarlady.