Almatydaǵy Qarǵaly ózeniniń aty ózgere me – ákim jaýap berdi

ALMATY. KAZINFORM – Almaty qalasynyń ákimi Erbolat Dosaev Naýryzbaı aýdanynyń turǵyndarymen kezdesti. Suraq-jaýap sessııa kezinde aýdan turǵyny Qarǵaly ózeniniń atyn ózgertýdi usyndy.

- Bul Qaraǵaıly aýyly (yqsham aýdan) jáne qasynda aǵyp jatqan ózen – Qaraǵaıly ózeni. Siz muny aýystyram dep aıtqansyz. Búginge deıin aýysqan joq. Qarǵaly ózeni Qarǵaly aýylynda aǵyp jatyr. Al bizdiki – Qaraǵaıly, – dedi turǵyn.

Aıtylǵan suraqqa jaýap bergen Erbolat Dosaev ózen ataýyn ózgertý máselesi Respýblıkalyq onomastıka komıssııasynyń qaraýynda ekenin atap ótti.

- Men bul suraqty qalalyq onomastıka komıssııasynan ótkizdim. Endi Respýblıka boıynsha komıssııamyz bar, olar qoldaǵannan keıin ózgerister bolady. Jalǵyz Qaraǵaıly emes, qalada jańadan qosylǵan ataýlary birdeı kóshelerdiń attaryn ózgertý jumystaryn júrgizemiz. Komıssııa jumysyn bitirgennen keıin osy kúzde ózgerister bolady dep senemin, – dedi Almaty ákimi.

Eske salaıyq, buǵan deıin Almaty ákimi Tóle bı kóshesin uzartý jumystary nege toqtap turǵanyn túsindirgen bolatyn.

Sondaı-aq, Erbolat Dosaev Almatyda 1-synypqa baratyn balalardyń 90%-y qazaq tilin tańdaıtynyn aıtqan edi.