Almatydaǵy «Qalqaman» metro beketiniń merzimi taǵy naqtylandy
ALMATY. KAZINFORM – Almaty ákimdigi «Qalqaman» metro beketiniń qurylysyn 2026 jyldyń alǵashqy jartysynda aıaqtaýdy josparlap otyr.
Ákimdiktiń málimetinshe, col jaqtaǵy tonnelde relster tóselip, jaryqtandyrý, kabel tartý, sý qubyry men drenaj júrgizý, ınjenerlik jabdyqtarǵa arnalǵan kronshteınder ornatý jumysy aıaqtaldy. Aldaǵy ýaqytta beınebaqylaý, daýys habarlaý júıesi, órt jáne kúzet dabyldaryn montajdaý josparlanǵan.
Oń jaq tonnelde qazý jumysynyń negizgi bóligi aıaqtaldy. Beket aýmaǵynda monolıtti qurylymdar boıynsha jumys sońǵy kezeńde. Sonymen qatar árleý, kommýnıkatsııalar tartý jáne jabdyqty ornatýǵa daıyndyq júrip jatyr. Qurylys táýlik boıy júrgizilip jatyr, nysanda 478-den astam maman jumys isteıdi.
Almaty ákimi Darhan Satybaldy jumys sapasy men belgilengen merzimdi qatań saqtaý qajet ekenin aıtty. Qurylys-montaj jumystary 2026 jyldyń birinshi jartysynyń sońyna deıin aıaqtaý josparlanǵan.
Eske salaıyq, buǵan deıin «Qalqaman» metro beketiniń qurylysy qarjylandyrý birqalypty bólinse, 2026 jyldyń alǵashqy jartysynda aıaqtalatynyn habarlanǵanbyz.
Negizi stantsııany bastapqyda 2025 jyly ashý josparlanǵan edi. Onyń iske qosylýy táýligine jolaýshy sanyn 20 myń adamǵa arttyrady dep josparlanǵan. Alaıda keıin merzim 2026 jylǵa shegerildi.
Sonymen qatar 2030 jylǵa deıin «Barlyq» bazaryna deıin taǵy úsh beket salý kózdelgen. Onda iri kólik-logıstıkalyq torap – Batys avtovokzaly, LRT jáne metro beketteri bar kólik haby qurylmaq.