Almatydaǵy «Qalqaman» metro beketiniń ashylýy keıinge shegerildi
ALMATY. KAZINFORM — Almatyda «Qalqaman» metro beketin ashý merzimi ózgerdi.
Almaty metropolıteni «Qalqaman» metro beketiniń jolaýshylar úshin 2026 jyldyń jeltoqsan aıynda ashylatynyn habarlady.
Buǵan deıin Almaty ákimi Darhan Satybaldy jumys sapasy men belgilengen merzimdi qatań saqtaý qajet ekenin aıtqan edi. Qurylys-montaj jumystary 2026 jyldyń birinshi jartysyna deıin aıaqtaý josparlanǵan bolatyn.
Metropolıten taratqan málimette bekette zamanaýı dızaın, keń platforma jáne qolaıly ınfraqurylym qarastyrylǵany aıtylǵan.
— Qalqaman beketi 2026 jyldyń jeltoqsan aıynda ashylady dep josparlanyp otyr, — delingen habarlamada.
Eske salaıyq, Almatyda «Qalqaman» beketiniń jobasy 2020 jyly qolǵa alyndy. Qurylys jumystary 2022 jyly bastaldy.
Buǵan deıin beket qurylysymen aınalysyp jatqan kompanııa qarjylandyrý birqalypty bólinbegendikten, jumys qarqyny tómen bolǵanyn málimdedi: 2020 jyly — 190 mln teńge, 2021 jyly — 600 mln, 2022 jyly — múldem qarjy bólinbegen. Negizgi qarjy 2023 jyldan bastap túse bastaǵan: 9,2 mlrd (2023), 2,3 mlrd (2024), 28 mlrd (2025), al 2026 jyly taǵy 17 mlrd teńge qarastyryldy.
Negizi stantsııany bastapqyda 2025 jyly ashý josparlanǵan edi. Onyń iske qosylýy táýligine jolaýshy sanyn 20 myń adamǵa arttyrady dep josparlanǵan. Alaıda keıin merzim 2026 jylǵa shegerildi.
