Almatydaǵy «Qalqaman» metro beketi qashan salynyp bitedi
ALMATY. KAZINFORM - Almatynyń Naýryzbaı aýdanynda ornalasqan «Qalqaman» metro beketiniń qurylysy 2026 jyldyń birinshi jartysynda aıaqtalady.
Májilis depýtaty Sergeı Ponomarev jańa bekettiń qurylysy júrip jatqan jerge baryp, jumys barysymen tanysty.
Onyń aıtýynsha, jerasty qabatynyń ereksheligine baılanysty qazý jumystary baıaý júrip jatyr. Jer astynan alyp tastar kezdesip, bul protsess arnaıy qazý qalqanyna kedergi keltirip otyr. Alaıda 28 mlrd teńge kóleminde qarjy bólingennen keıin qazý jyldamdyǵy táýligine 4-5 metrge deıin artýǵa tıis.
— Keler jyldyń mamyr-maýsym aılarynda munda poıyzdar qatynaı bastaıdy, — dedi depýtat Instagram-da jarııalaǵan beınejazbasynda.
Jobanyń bas merdigeri Bazis Construction kompanııasynyń málimetinshe, búginde sol jaq baǵyttaǵy tonneldiń (1 591 m) qazý jumysy tolyq aıaqtalǵan, jol tóseý jumystary bastalyp ketken. Oń jaq tonneldiń 950 metri (1594-ten) qazylyp bitken. Sondaı-aq beketiniń alǵashqy eki kezeńindegi betondaý jumystary da tolyq bitken.
Josparǵa sáıkes, tonnel qazý 2026 jylǵy qańtarda aıaqtalady. Jol tóseý jáne ınjenerlik jumystar — 2026 jylǵy sáýirde, monolıtti jumystar — 2025 jylǵy jeltoqsanda, al sáýlettik árleý men abattandyrý — 2026 jyldyń birinshi jartysynda bitpek.
Kompanııa ókilderiniń málemetinshe, normatıv boıynsha beket qurylysyna 36 aı qarastyrylǵanymen, nysandy 14 aıǵa erte aıaqtaý kózdelip otyr.
Qarjylandyrý birqalypty bólinbegendikten, ol jumys qarqynyna da áser etken. 2020 jyly – 190 mln teńge, 2021 jyly – 600 mln, 2022 jyly – múldem qarjy bólinbegen. Negizgi qarjy 2023 jyldan bastap túse bastady: 9,2 mlrd (2023), 2,3 mlrd (2024), 28 mlrd (2025), al 2026 jyly taǵy 17 mlrd teńge qarastyrylǵan.
Sonymen qatar jobaǵa kedergi bolǵan faktordyń biri – beket aýmaǵyndaǵy turǵyn úılerdi buzý. Sońǵy úıler 2025 jylǵy sáýirde ǵana buzylyp, qurylys alańy merdigerge resmı tapsyryldy.
Buǵan deıin Almaty ákimi Darhan Satybaldy jańa beket qurylysynyń barysyn tekserip, jumysty jedeldetýdi tapsyrǵan edi.
«Qalqaman» stantsııasyn 2025 jyly ashý josparlanǵan edi. Onyń iske qosylýy táýligine jolaýshylar aǵynyn 20 myń adamǵa arttyrady dep kútilgen. Alaıda keıin merzim 2026 jylǵa shegerildi.
Sonymen qatar, 2030 jylǵa deıin «Barlyq» bazaryna deıin taǵy úsh beket salý kózdelgen. Onda iri kólik-logıstıkalyq torap — Batys avtovokzaly, LRT jáne metro beketteri bar kólik haby qurylmaq.
Budan bólek, Almaty metrosynyń úshinshi jelisi «Alataý» qalasynan «Mızam» bazary arqyly qazirgi «Saıran» beketine deıin tartylýy múmkin.
2024 jyly Almaty ákimi Erbolat Dosaev ta áýejaı baǵytyna jańa jeli salý jobasy ázirlenip jatqanyn aıtqan edi. Uzyndyǵy 14 shaqyrym bolatyn bul jeli «Jibek joly» beketinen shyǵyp, áýejaıǵa deıin sozylady.
Jalpy alǵanda, Almatydaǵy jańa metro beketterin salýǵa shamamen 1 mlrd dollar ınvestıtsııa tartý josparlanyp otyr.