Almatydaǵy «Qalqaman» metro beketi 99%-ǵa daıyn — ákimdik
ALMATY. KAZINFORM — Almatydaǵy «Qalqaman» metro beketiniń qurylysy aıaqtalýǵa jaqyn.
Qazir stantsııada sońǵy qurylys-montaj júrgizilip jatyr. Nysandy jyl sońyna deıin aıaqtaý josparlanǵan. Búginde nysannyń qurylys daıyndyǵy — 99%.
— Bul — aýdan turǵyndary úshin qoǵamdyq kóliktiń jańa ári jyldam túrine qoljetimdilikti arttyratyn mańyzdy joba. Metro iske qosylǵannan keıin turǵyndardyń qala ortalyǵyna jáne Almatynyń basqa aýdandaryna qatynaýy jeńildeıdi, — dedi Naýryzbaı aýdanynyń ákimi Názıra Toǵyzbaeva.
Sonymen qatar aldaǵy ýaqytta metro jelisin «Barlyq» bazary baǵytyna qaraı jalǵastyrý josparlanyp otyr. Bul baǵytta taǵy úsh stantsııa salynbaq.
Eske salaıyq, Almatyda «Qalqaman» beketiniń jobasy 2020 jyly qolǵa alyndy. 2022 jyly qurylys bastaldy.
Buǵan deıin beket qurylysymen aınalysyp jatqan kompanııa qarjylandyrý birqalypty bólinbegendikten, jumys qarqyny tómen bolǵanyn málimdedi: 2020 jyly — 190 mln teńge, 2021 jyly — 600 mln, 2022 jyly — múldem qarjy bólinbegen. Negizgi qarjy 2023 jyldan bastap túse bastaǵan: 9,2 mlrd (2023), 2,3 mlrd (2024), 28 mlrd (2025), al 2026 jyly taǵy 17 mlrd teńge qarastyryldy.
Negizi stantsııany bastapqyda 2025 jyly ashý josparlanǵan edi. Onyń iske qosylýy táýligine jolaýshy sanyn 20 myń adamǵa arttyrady dep josparlanǵan. Alaıda keıin merzim 2026 jylǵa shegerildi.
