Almatydaǵy ınjenerlik jeliler qysqa daıyn

ALMATY. KAZINFORM – Almatynyń kommýnaldyq qyzmetteri sý qubyry men káriz jelilerin qysqy maýsymǵa daıyndaý jumystaryn tolyq aıaqtady.

Kommýnaldyq kásiporynnyń málimetinshe, qysqy kezeńge qajet otyn jáne reagent qory jasaqtalǵan. Elektr jabdyqtaryna tolyq tekserý júrgizilip, sorǵy stantsııalary men JEO-1, JEO-2, iri jáne shaǵyn – qazandyqtarǵa jetkizýshi jeliler men jabdyqtar synaqtan ótti.

– Jazǵy jóndeý kezeńinde jalpy kólemi 103 myń tekshe metr bolatyn 30 taza sý rezervýary men 800 km-den astam sý jáne káriz jelileri tazartyldy. 9,1 myń órt gıdrantyna tekserý men jóndeý júrgizildi, 100 myńnan astam qudyq tazartylyp, 1 200 japqysh armatýra aýystyryldy, - dedi «Almaty Sý» memlekettik kommýnaldyq kásipornynyń resmı ókili, departament dırektory Serik Shaǵyrov.

Sonymen qatar avtokólik jáne arnaıy tehnıkalarǵa maýsymdyq qyzmet kórsetý men jóndeý jumystary oryndaldy. Qala boıynsha táýlik boıy kezekshilik etetin 44 apat brıgadasy tolyq tehnıkamen jáne qajetti quraldarmen qamtamasyz etilgen.

Buǵan qosa, qazan aıynan bastap almatylyqtar sý tutyný kólemine qaramastan, biryńǵaı tarıf boıynsha tólem túbirtekterin ala bastady. Bul tártip jyl sońyna deıin saqtalady, al 2026 jyldan bastap naqty tutyný boıynsha esepteý qaıta engiziledi.

Eske salaıyq, buǵan deıin Almatyda 8 qazannan bastap áleýmettik nysandarǵa jylý beriletinin habarlaǵanbyz.

Jylytý maýsymyn ádettegiden erterek bastaý týraly sheshim aýa temperatýrasynyń kúrt tómendeýine baılanysty qabyldandy.