Almatydaǵy ınklıýzıvti bilim berý ortalyǵy jabylmaıdy — mınıstrlik
ALMATY. KAZINFORM — Arnaıy jáne ınklıýzıvti bilim berýdi damytýdyń ulttyq ǵylymı- praktıkalyq ortalyǵynyń jabylý yqtımaldyǵy jónindegi ata-analardyń ótinish-shaǵymdaryna qatysty Oqý-aǵartý mınıstrligi túsinik berdi.
Vedomstvoda málim etkendeı, ortalyqtyń jumysy toqtaıtyny turaly aqparat shyndyqqa janaspaıdy.
— Kerisinshe, qazirgi ýaqytta ortalyqty Astana qalasynda Ǵylymı-zertteý ınstıtýtyna transformatsııalaý jáne Almaty qalasynda onyń bilim berý júıesindegi úılestirýshi ári ǵylymı-ádistemelik rólin kúsheıte otyryp, Úzdiksiz ınklıýzıvti bilim berýdiń ulttyq ǵylymı-praktıkalyq ortalyǵyn qurý jumystary istelip jatyr. Qoldanystaǵy jarǵyǵa sáıkes, Ortalyqtyń negizgi fýnktsııasy — eldegi arnaıy bilim berý júıesine ǵylymı-ádistemelik súıemeldeý men oqý-ádistemelik qamtamasyz etýdi júzege asyrý. Osy maqsatta ortalyqta arnaıy pedagogıka salasyndaǵy ózekti ǵylymı izdenis baǵyttaryna baılanysty qatysýshylar quramy turaqty túrde jańartylyp otyratyn eksperımenttik toptar jumys isteıdi, — delingen habarlamada.
Mınıstrlikten atap ótkendeı, bul arnaıy balabaqsha nemese ońaltý ortalyǵy emes, ınklıýzıvti bilim berý saıasatynyń turaqty damýyna baǵyttalǵan mamandandyrylǵan ǵylymı ortalyq. Ǵylymı qyzmetkerlerdiń shtattyq sany tolyq saqtaldy, qysqartý júrgizilgen joq. Ortalyqtyń jumysy qalypty tártipte jalǵasyp jatyr.
— Sonymen qatar, ınklıýzıvti jáne arnaıy bilim berýdi damytý — bilim berý salasyndaǵy memlekettik saıasattyń basym baǵyttarynyń biri ekenin eske salamyz. Bul baǵytta mınıstrlik ınklıýzıvti jáne arnaıy bilim berýdi jetildirý men damytý boıynsha kezeń-kezeńimen sharalar qabyldap jatyr. Barlyǵy bir jyldyń ishinde shamamen 20-ǵa jýyq normatıvtik-quqyqtyq akti qabyldandy. Sonymen qatar «Erekshe bilim berýdi qajet etetin balalardy keshendi qoldaý týraly» zań ázirlenip jatyr, — dedi Oqý-aǵartý mınıstrliginiń resmı ókili Mereke Amangeldiqyzy.
Eske salaıyq, buǵan deıin QR Oqý-aǵartý mınıstri Ǵanı Beısembaev úzdiksiz ınklıýzıvti bilim berýdiń ulttyq ortalyǵy qurylatyny týraly aıtqan bolatyn.