Almatydaǵy Yqylas mýzeıi jańa jumys kestesine kóshti

ALMATY. KAZINFORM – 2026 jyly naýryz aıynan bastap Almatydaǵy Yqylas atyndaǵy halyq mýzykalyq aspaptar mýzeıi kelýshiler úshin jańa jumys kestesin engizdi. 

Endi mýzeı seısenbiden jeksenbige deıin 10:00-den 00:00-ge deıin jumys isteıdi. Dúısenbi – sanıtarlyq kún.

Almaty ákimdiginiń habarlaýynsha, jańartylǵan jumys kestesi qala turǵyndary men qonaqtaryna mýzeıge keshki ýaqytta jáne ózderine yńǵaıly kez kelgen ýaqytta kelýge múmkindik beredi.

Mýzeı 1981 jyly qurylǵan. Mýzeı qorynda qazaqtyń ulttyq mýzykalyq aspaptarymen qatar álemniń 50-den astam eliniń mýzykalyq mádenıetin tanytatyn biregeı jádigerler saqtalǵan.

Qazirgi ýaqytta mýzeıde 9 ekspozıtsııalyq zal jumys isteıdi. Ekspozıtsııada jelbýaz, adyrna, tuıaqtas sııaqty sırek kezdesetin qazaq mýzykalyq aspaptary, sondaı-aq keń taralǵan dombyra, qobyz, sybyzǵy kórsetilgen.

Aıta keteıik, buǵan deıin mýzeı seısenbiden jeksenbige deıin 10:00-den 19:00-ge deıin jumys isteıtin.

Yqylas atyndaǵy halyq mýzykalyq aspaptar mýzeıi Zenkov kóshesi, 24a mekenjaıynda ornalasqan.

Eske salaıyq, ánshi Dımash Qudaıbergen 2026 jylǵy 18 aqpanda Almatydaǵy Yqylas atyndaǵy halyq mýzykalyq aspaptar mýzeıinde ótken «Dımash: bir daýys – myń el» kórmesiniń ashylýynda mýzeı qoryna jeke dombyralaryn tabystaǵanyn habarlaǵanbyz. 

Olardyń biri – bala kúninde atasy syıǵa bergen, shyǵarmashylyq jolyna serik bolǵan qasterli dombyrasy, ekinshisi – ánshiniń qoltańbasy qoıylǵan aspap.