Almatydaǵy hosteldegi órt: qorǵaýshy sottalýshylardyń birine qatysty isti toqtatýdy talap etti
ALMATY. KAZINFORM — Almatyda hosteldegi órtke qatysty sot otyrysy ótip jatyr.
Іs Almaly aýdandyq sotynda sýdıa Ernar Qasymbekovtiń tóraǵalyǵymen qaralyp jatyr. QR Qylmystyq kodeksiniń 292-babynyń 3-bóligi (Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha eki adamǵa aıyp taǵylyp otyr. Olar – ALA Hostel dırektory Ádilbek Muhamedıarov pen «Gıdservıs» kompanııasynyń ıesi Aleksandr Pekelnık.
Sot protsesi barysynda Aleksandr Pekelnıktiń qorǵaý taraby sotta jaýap bergen mamandardyń qorytyndylaryn usyndy. Advokat Pekelnıkti qylmystyq jaýapkershilikten bosatýdy talap etip otyr.
Sebebi, sala mamandardyń sózinshe, «Gıdservıs» kompanııasy órt dabyl júıesin hostel úshin emes, saýda orny retinde tirkelgen nysanǵa ornatqan.
Mamandardyń aıtýynsha, «Gıdservıs» kompanııasy avtomatty órt dabyly júıesin ol jerde hostel ornalasqanǵa deıin, ıaǵnı nysannyń saýda maqsatyna arnalǵan kezinde ornatqan. Keıin nysannyń maqsaty ózgertilip, qaıta josparlanǵannan soń, qoldanystaǵy zańnamaǵa sáıkes, jańa órt qaýipsizdigi júıesi ornatylýy tıis bolǵan. Alaıda bul talap oryndalmaǵan.
Sondaı-aq Qazaqstanda jertólede turǵyn bólmeler ornalastyrýǵa tyıym salynǵan. Tipti órt dabyly durys jumys istegen kúnniń ózinde de, adam shyǵynyna jol bermeıtin tútin júıesi men evakýatsııalyq shyǵý joldary bolýy shart. Bul júıeler jertólede múlde bolmaǵan.
Budan bólek, jaýap alǵan mamandardyń sózine súıensek, «Gıdservıs» kompanııasy órt qaýipsizdigine jaýapty emes. Sebebi tehnıkalyq qyzmet kórsetý týraly kelisimshart joq. Órt qaýipsizdigine nysannyń ıesi men jalǵa alýshy jaýapty bolýy kerek.
Osyǵan qaramastan, QR QK 292-baby boıynsha Pekelnıkke taǵylǵan aıyp áli de óz kúshinde qalyp otyr.
Advokattyń aıtýynsha, QR Qylmystyq-protsestik kodeksiniń 35-babynyń 7-bóligine sáıkes, eger sotta qylmystyq qýdalaýdy boldyrmaıtyn mán-jaılar anyqtalsa, memlekettik aıyptaýshy aıyptaýdan bas tartýǵa mindetti.
Al memlekettik aıyptaýshy óz kezeginde aıyptaýdan bas tartpaıtynyn, al qorǵaýshynyń ótinishin qabyldaýǵa áli erterek ekenin jetkizdi.
Onyń sózinshe, tergeý tolyq aıaqtalǵan joq, Pekelnıktiń bul iske qatystylyǵy týraly túpkilikti sheshimdi sýdıa tek sot jarys sózinen keıin qabyldaıdy.
Advokat sot protsesi barysynda istiń barlyq mán-jaıyn anyqtaýǵa jetkilikti múmkindik bolǵanyn jáne «Gıdservıs» JK-niń kinási dáleldenbegenin alǵa tartty. Muny kýálar men arnaıy mamandardyń jaýaby rastaıdy.
Sot óz sheshimin sot tergeýi tolyq aıaqtalǵannan keıin jarııa etetin bolady.
Buǵan deıin sýdıa isti prokýratýraǵa qaıtarýdan bas tartqany týraly jazǵanbyz.
Osyǵan deıin prokýror Nurazhan Myrzaly aıyptaý aktisin oqyǵan bolatyn.
Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy.
Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.
Keıinirek órtengen hosteldiń ıeleri belgili boldy.
Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.
2023 jyldyń jeltoqsan aıynda hosteldiń basshysy ustaldy.