Almatydaǵy hostelde bolǵan órt isi boıynsha apellıatsııalyq sot sheshim shyǵardy

ALMATY. KAZINFORM – Almatyda 13 adamnyń ómirin qıǵan hosteldegi órtke qatysty jábirlenýshiler men sottalýshylardyń apellıatsııalyq shaǵymy qaraldy.

Bıyl shildede birinshi satydaǵy sot Qylmystyq kodekstiń 292-babynyń 3-bóligi (Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha ALA Hostel dırektory Ádilbek Muhamedıarovty 5 jylǵa, «Gıdservıs» kompanııasynyń ıesi Aleksandr Pekelnıkti 4 jylǵa bas bostandyǵynan aıyrý jazasyn taǵaıyndaǵan edi.

Apellıatsııalyq otyrys kezinde advokattar óz qorǵaýshylarynyń kinásiz ekenin aıtyp, birinshi satydaǵy sottyń úkimin joıýdy surady. Olar sot alǵashqy ınstantsııada qorǵaýshy taraptyń ýájderin eskerýsiz qaldyrǵanyn aıtty.

Al prokýratýra ókili úkimdi ózgerissiz qaldyrýdy ótindi.

Barlyq taraptyń ýájin tyńdaǵannan keıin sot mynadaı sheshim qabyldady:

• Ádilbek Muhamedıarovqa qatysty úkim ózgerissiz qaldyryldy;
• Aleksandr Pekelnıkke qatysty úkimniń tek moraldyq ótemaqy boıynsha bóligi ózgerdi — jábirlenýshilerge A. jáne A. 7 mıllıon teńge tóleý týraly sheshim kúshin joıdy.

Jábirlenýshilerdiń azamattyq talaby qaraýsyz qaldyryldy.

Eske salaıyq, 2023 jyly 30 qarashada Ádı Sháripov, 86 mekenjaıy boıynsha «Almaty Hostel» hosteli órtengen edi. Onyń saldarynan hostelde 13 adam mert boldy.

Mert bolǵan 13 adamnyń tórteýi — sheteldik (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy — Qazaqstan Respýblıkasynyń azamaty.

Keıinirek órtengen hosteldiń ıesi belgili boldy. Hostel ǵımaraty Halyk Bank-ke tıesili. Ony jalǵa alǵan — «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan. 

2023 jyly jeltoqsanda hosteldiń basshysy ustaldy.