Almatydaǵy ǵımarattardyń qanshasy jer silkinisine tózimdi
ASTANA. KAZINFORM — Almatynyń sáýlet jáne qala qurylysy basqarmasy resmı saýalymyzǵa joldaǵan jaýabynda qaladaǵy ǵımarattardyń qanshasy jer silkinisine tótep bere alatynyn málimdedi.
Vedomstvonyń habarlaýynsha, Almatynyń qoldanystaǵy qurylys nysandarynyń seısmıkalyq tózimdiligin aıqyndaý maqsatynda pasporttaý jumystary júrgizildi. Mundaı sharalar eki kezeńde, ıaǵnı 2017-2018 jyldary jáne 2023-2024 jyldary atqarylǵan.
— 2017-2018 jyldary júrgizilgen pasporttaý qorytyndysy boıynsha 10 525 nysan (8 176 — kóppáterli turǵyn úı, 2 349 — qoǵamdyq azamattyq ǵımarat) zertteldi. Onyń ishinde 3 101 nysan seısmıkalyq turǵydan tózimsiz dep tanyldy, — delingen habarlamada.
Al 2023-2024 jyldary júrgizilgen pasporttaýdyń ekinshi kezeńi sheńberinde 10 916 nysan (1 641 — kóppáterli turǵyn úı, 9 275 — qoǵamdyq-azamattyq ǵımarat) zertteldi.
Basqarma málimetinshe, onyń ishinde 2 562 nysan seısmıkalyq turǵydan tózimsiz dep tanyldy (408 — kóppáterli turǵyn úı, 2 154 — qoǵamdyq-azamattyq ǵımarat).
Bul olqylyqtardyń ornyn toltyrý maqsatynda birqatar sharýa atqarylǵan.
— Pasporttaý nátıjeleri negizinde, sondaı-aq qolda bar qarajatty eskere otyryp, 2017-2024 jyldar aralyǵynda Almaty qalasynyń ákimdigi 82 nysanda seısmıkalyq kúsheıtý jumystaryn júrgizdi, onyń ishinde 64 — bilim berý, 16 — densaýlyq saqtaý jáne 2 — ákimshilik nysan, — delingen resmı jaýapta.
Aıta keteıik, buǵan deıin Almatyda jer silkingenin jazǵanbyz.
