Almatydaǵy eski tas tóseýish Qaskeleńge qalaı jetti - ákimdik túsinik berdi
ALMATY. KAZINFORM – Almatylyq bloger áleýmettik jelide vıdeo jarııalap, onda Ýálıhanov kóshesindegi gúlzardan bútin ári jap-jańa tas tóseýish Qaskeleńdegi jeke úıge jetkizilgenin aıtty.
Vıdeodan blogerdiń tas tóseýishti tıegen kóliktiń izine túskenin kórýge bolady. Ol eski materıaldy Qaskeleńde ornalasqan úıdiń ıesi jeke maqsatta satyp alǵanyn anyqtaǵan.
Avtordyń aıtýynsha, tas tóseýishti tıegen taǵy bir kólik Shamalǵanǵa jetken. Alaıda bul kólik artynsha qalaǵa oralyp, «ákimdiktiń qoımasyna» kirgen.
Bul vıdeoǵa qatysty Almatynyń Medeý aýdany ákimdigi túsinik berdi.
Ákimdik Ýálıhanov kóshesinde (Shevchenko kóshesinen Qazybek bı kóshesine deıingi aralyqta) abattandyrý jumystary júrgizilip jatqanyn habarlady. Onyń aıasynda eskirgen tas tóseýish aýystyrylyp, jańa jaryqtandyrý ornatylyp, avtosýarý júıesi, shaǵyn arhıtektýralyq nysandar men qorshaýlar qoıylyp, kógaldandyrý jumystary jasalyp jatyr.
– Bul gúlzarda tas tóseýish keıingi ret 2004 jyly aýystyryldy. 2014 jyly jóndeý jumystary júrgizildi, biraq tóseýish jańartylǵan joq – tek qorshaýlar men sýarý júıesiniń bir bóligi ornatyldy. Osylaısha, qazirgi tóseýish 20 jyldan astam ýaqyt paıdalanylyp, tolyq aýystyrýdy qajet etti, - delingen habarlamada.
Jergilikti atqarýshy organnyń málimetinshe, 2024 jyly júrgizilip jatqan jóndeý barysynda burynǵy úlgidegi qyrly jáne oıyqty tas tóseýishtiń dál sondaı túrin tabý múmkin bolmaǵan. Bul materıal óndiristen shyǵarylyp, tehnıkalyq turǵydan eskirgen. Sonymen qatar birqatar jerde tóseýishtiń tozǵany anyqtalǵan.
– Sol sebepti merdiger uıym ony tolyq aýystyryp jatyr. 500 mln teńge (QQS-men) tek Ýálıhanov gúlzaryna emes, basqa nysandarǵa da jumsalady. Onyń ishinde Shevchenkodan Qazybek bıge deıingi aralyqtaǵy jumystarǵa 296 mln teńge, al Qarasaı batyr gúlzarynan (Dostyq pen Nazarbaev kósheleriniń arasyndaǵy bólik) atqarylyp jatqan jumystarǵa 204 mln teńge bólindi, - dep habarlady Almatynyń Medeý aýdany ákimdigi.
Al ákimdik tas tóseýishtiń Almaty oblysyna jetkizilýine qatysty kelisimshart boıynsha buzylǵan materıaldy kádege jaratý qarastyrylǵanyn atap ótti.
– Osyǵan oraı merdiger uıymnyń ótinishi jáne tapsyrys berýshimen kelisim negizinde shamamen 90 sharshy metr tóseýish muqtaj otbasyna berildi. Qalǵan materıal merdiger uıymnyń qoımasynda saqtaýly, - delingen resmı habarlamada.
Eske salaıyq, buǵan deıin Almatyda 40 qabatty keshenniń qurylysy toqtatylǵanyn jazǵanbyz.