Almatydaǵy Esentaı ózeni arqyly ótetin kópir 90%-ǵa daıyn: Qurylys qashan aıaqtalady
ALMATY. KAZINFORM- Almatyda Ál-Farabı dańǵyly mańyndaǵy Esentaı ózeni arqyly ótetin velojaıaý júrginshiler kópirleriniń qurylysyn 2026 jyldyń qazan aıynyń sońyna deıin tolyq aıaqtaý josparlanyp otyr. Nysannyń ońtústik bóligi daıyn, al soltústik bóliginiń qurylysy 90%-ǵa aıaqtalǵan.
Almaty qalasy Jol ınfraqurylymyn damytý basqarmasynyń basshysy Oljas Shabdanov redaktsııanyń resmı saýalyna jaýap berip, kópirdiń ońtústik jaǵyndaǵy velojaıaý júrginshiler kópirinde qurylys-montaj jumystary aıaqtalǵanyn habarlady. Qazir soltústik bóliktegi kópirdiń qurylysy jalǵasyp jatyr.
— Qazir soltústik jaǵynda ornalasqan velojaıaý júrginshiler kópiriniń qurylysy júrgizilip jatyr. Onyń daıyndyq deńgeıi — 90%. Jobada kózdelgen barlyq jumysty 2026 jyldyń qazan aıynyń sońyna deıin tolyq aıaqtaý josparlanǵan, — dedi ol.
Qurylysty aıaqtaý merzimi birneshe ret keıinge shegerildi
Esentaı ózeni arqyly ótetin avtomobıl kópirin qaıta jańǵyrtý jáne jeke velojaıaý júrginshiler kópirlerin salý jumystary birneshe jyldan beri jalǵasyp keledi. 2025 jyldyń kúzinde Almaty máslıhatynyń depýtaty Saltanat Serikova nysandy qaıta jańǵyrtýǵa 2021 jyldan beri bıýdjet qarajaty bólinip kele jatqanyn aıtqan.
2023 jyly ákimdik negizgi kólik kópirin qaıta jańǵyrtý jáne eki jeke velojaıaý júrginshiler kópirin salýdy kózdeıtin kelisimshart jasasqan. Onyń quny 2 mıllıard teńgeden asady. Kólik kópirine qatysty jumystar aıaqtalǵanymen, velojaıaý júrginshiler ınfraqurylymyn salý jumystary sozylyp ketken.
Bastapqyda barlyq jumysty 2023 jyldyń sońyna deıin aıaqtaý josparlanǵan. Keıin nysandy aıaqtaý merzimi 2024 jyldyń jeltoqsanyna, 2025 jyldyń mamyry men maýsymyna aýystyryldy. Keıin soltústik velojaıaý júrginshiler kópirin 2026 jyldyń mamyrynda aıaqtaý josparlandy.
Endi basqarma jańa merzimdi atady — 2026 jyldyń qazan aıynyń sońy.
Redaktsııa resmı saýalda qurylys merzimderiniń birneshe ret keıinge shegerilý sebepterin de surady. Vedomstvonyń málimetinshe, 2024–2025 jyldary jobalyq qujattamaǵa túzetýler engizilgen. Al bıyl 30 naýryzda joba boıynsha memlekettik saraptamanyń oń qorytyndysy alynǵan.
Quny 2,2 mlrd teńgeden asady
Qazirgi tańda jumys jobasynyń jalpy quny — 2 mıllıard 275,6 mıllıon teńge. Bas merdiger — «Golden City DS» JShS.
Basqarmanyń málimetinshe, qazir qurylys alańynda 20 jumysshy, bes ınjenerlik-tehnıkalyq maman jáne tórt arnaıy tehnıka jumys istep jatyr.
— Jobany tolyq aıaqtap, nysandy paıdalanýǵa berý úshin ınjenerlik jelilerdi, syrtqy jaryqtandyrýdy jáne irgeles aýmaqty abattandyrý jumystaryn aıaqtaý qajet, — dedi Oljas Shabdanov.
Eske salsaq, Esentaı ózeni ústindegi kópir qurylysy kezinde qansha aǵash kesiletini habarlandy.
