Almatydaǵy Esentai city turǵyn úı kesheninde gaz jaryldy
ALMATY. KAZINFORM – Medeý aýdanynda ornalasqan qymbat turǵyn úı kesheninde tótenshe jaǵdaı oryn aldy.
Áleýmettik jelide belgisiz jarylystan keıin turǵyn úı kesheniniń aýmaǵyndaǵy jaǵdaıdyń beınejazbasy tarady.
Almaty ákimdiginiń málimetinshe, Qapparov kóshesinde ornalasqan úsh qabatty turǵyn úıde gaz-aýa qospasy jarylǵan. Alaıda órt bolmaǵan.
- Aldyn ala málimetter boıynsha jarylysqa tabıǵı gazdyń taraýy sebep bolýy múmkin, - dep habarlady ákimdikten.
Oqıǵa saldarynan eki kámeletke tolmaǵan bala jeńil jaraqat alǵan. Dárigerler tekserip, qajetti medıtsınalyq kómek kórsetkennen keıin olar úılerine jiberildi, aýrýhanaǵa jatqyzý qajet bolmady.
- Qazirgi ýaqytta jaýapty qyzmetter oqıǵanyń sebepteri men mán-jaıyn anyqtap jatyr, - delingen ákimdik jaýabynda.
Eske salaıyq, buǵan deıin Kókshetaýda páterde gaz jarylyp, 91 jastaǵy qarııa qutqarylǵan bolatyn.
