Almatydaǵy qurylysy aıaqtalǵan eń úlken meshit nege áli ashylmady
ALMATY. KAZINFORM – Oraza aıtta bir kúnge ashylyp, 40 myńǵa jýyq adamdy jınaǵan Almatydaǵy eń úlken meshit nege áli óz jumysyn bastamady? Qazaqstan musylmandary dinı basqarmasy men Almatynyń ádilet departamenti onyń naqty sebebin túsindirdi.
Ǵımarat Almatynyń Alataý aýdany Ǵajaıyp shaǵyn aýdany, 6 mekenjaıynda ornalasqan. Meshitke 20 000 adam syıady, sondaı-aq 1 100 kólikke arnalǵan avtoturaq pen kitaphana, 400 adamǵa arnalǵan is-sharalar zaly men neke qııýǵa arnalǵan arnaıy aımaq ta bar.
Bıyl qulshylyq ordasynda Oraza aıt merekesine oraı Aıt namazy oqylyp, meshit bir kúnge ashylǵan edi. Sol kezde Aıt namazyna 40 myńǵa jýyq adam jınalǵany habarlanǵan.
Qazaqstan musylmandary dinı basqarmasynyń málimetinshe, «Alataý» meshitiniń qurylysy 2019 jyly bastalyp, 2025 jyly aıaqtaldy. Ony Almaty building projects qurylys kompanııasy salǵan.
– Qurylysy aıaqtalǵanymen, onyń ishindegi kabınetterdegi jıhazdar men jamaǵatqa yńǵaıly bolýy úshin ózge talaptar áli de daıyn emes. Búginde bul jumystar júrgizilip jatyr, - delingen resmı jaýapta.
Meshit ornalasqan jer teliminiń qujattaryn zańdastyrý 2025 jylǵy qarasha aıynyń basynda aıaqtalǵan.
– Qazirgi tańda meshit ǵımaratynyń qujattary eshqandaı kedergisiz daıyndalyp jatyr, - delingen jaýapta.
Sondaı-aq basqarma meshit ǵımaratynyń qujattary tolyq aıaqtalyp, meshit QMDB-nyń fılıaly bolyp jergilikti Ádilet departamentinen resmı tirkeýden ótken soń ashylatynyn habarlady.
Agenttik tilshisi Almaty ádilet departamentiniń baspasóz qyzmetimen de baılanysyp kórdi.
Vedomstvo meshitti resmı tirkeý týraly ótinish áýeli Halyqqa qyzmet kórsetý ortalyǵynda tirkelip, sodan keıin ǵana Ádilet departamenti bazasyna túsetinin málimdedi. Al 25 qarashaǵa deıin vedomstvoǵa bul meshitke qatysty tıisti ótinish túspegeni belgili boldy.
Aıta keteıik, Qazaqstanda búginde 2 850 meshit jumys isteıdi, olardyń barlyǵy elimizdiń musylmandarynyń dinı basqarmasynyń qaramaǵynda. Buǵan deıin meshitterdiń qyzmeti qalaı retteletini jáne olar qandaı qarjy kózderi arqyly jumys isteıtinin jazǵan edik.
Sondaı-aq Túrkistandaǵy 5 myń oryndyq meshittiń qurylysy qashan aıaqtalatynyn da habarlaǵanbyz.