Almatydaǵy Donorlyq festıvalinde 36 lıtrden astam qan jınaldy
ALMATY. KAZINFORM – Almaty qalasynda Dúnıejúzilik qan donory kúnine oraı Donorlyq festıvali ótti. Іs-shara ártúrli mamandyq ıeleri men túrli jastaǵy azamattardy biriktirdi. Olardy ortaq maqsat – qan quıýǵa muqtaj jandarǵa kómek kórsetý nıeti toǵystyrdy.
Festıvaldi Almaty qalalyq kardıologııalyq ortalyǵy men Qalalyq qan ortalyǵy Almaty qalasy Qoǵamdyq densaýlyq saqtaý basqarmasy men Almaly aýdany ákimdiginiń qoldaýymen uıymdastyrdy.
Aktsııa barysynda 98 adam tirkeýden ótti. Mindetti medıtsınalyq tekserý men densaýlyq jaǵdaıyn baǵalaýdan keıin 72 qatysýshy qan tapsyrýǵa jiberildi, al 26 adamǵa medıtsınalyq kórsetilimderge baılanysty ýaqytsha shekteý qoıyldy.
Nátıjesinde 36 lıtrden astam qan (36 936 ml) daıyndaldy. Qatysýshylardyń arasynda birinshi oń qan tobynyń ıeleri basym boldy – 27 adam, ekinshi oń qan toby – 17 adam, úshinshi oń qan toby – 16 adam, tórtinshi oń qan toby – 7 adam. Sonymen qatar sırek kezdesetin teris rezýs-faktory bar donorlar da qan tapsyrdy: úshinshi qan toby – 3 adam, tórtinshi qan toby – 2 adam.
Qan men onyń komponentteri jol-kólik oqıǵalarynan zardap shekkenderge, kúrdeli operatsııadan keıingi patsıentterge, onkologııalyq jáne gematologııalyq aýrýlary bar adamdarǵa, sondaı-aq bosaný kezinde asqynýlar týyndaǵan áıelderge kún saıyn qajet.
Megapolıstiń densaýlyq saqtaý júıesi úshin donorlyqtyń strategııalyq mańyzy zor. Jyl saıyn qan komponentterine degen qajettilik shamamen 35 myń dozany nemese 11 myń lıtrden astam kólemdi quraıdy. Turaqty túrde júrgiziletin qan quıýlardyń arqasynda myńdaǵan patsıent qajetti medıtsınalyq kómek alady. Kún saıyn 120-ǵa deıin transfýzııa jasalady jáne olardyń árqaısysy adamnyń ómiri men densaýlyǵyn saqtap qalýda sheshýshi ról atqarýy múmkin.
Іs-shara sheńberinde Almaty qalasy Qoǵamdyq densaýlyq saqtaý basqarmasynyń basshysy Marat Pashımov uzaq jyldar boıy turaqty túrde qan tapsyryp, óz úlgisimen ózgelerdi jigerlendirip júrgen donorlyq qozǵalysqa qatysýshylarǵa alǵys hattar tabystady.
Festıval donorlyqtyń qıyn jaǵdaıǵa tap bolǵan jandarǵa kómektesýdiń eń qarapaıym ári mańyzdy tásilderiniń biri bolyp qala beretinin taǵy bir márte eske saldy.
Aıta ketsek, buǵan deıin
