Almatydaǵy dámhanadan shyqqan órt 600 sharshy metr aýmaqty sharpydy
ASTANA. KAZINFORM – Almaty qalasynyń Jetisý aýdanyndaǵy dámhanalardyń birinde shyqqan órt 600 sharshy metr aýmaqty qamtydy.
Tótenshe jaǵdaılar mınıstrliginiń málimetinshe, 19 maýsym kúni 112 pýltine dámhanalardyń birinen tútin shyqqany týraly habarlama túsken. Oqıǵa ornyna jedel jetken órt sóndirýshiler ashyq jalyndy anyqtap, joǵary dárejeli shaqyrý boıynsha jumys júrgizdi.
«Órtti sóndirý barysynda qutqarýshylar qaýipti aımaqtan 5 gaz jáne 2 ottegi ballonyn alyp shyqty. Bul jaǵdaıdyń odan ári kúrdelený qaýpin boldyrmaýǵa múmkindik berdi», – dep habarlady TJM.
Órttiń bastapqy kezeńinde qutqarýshylar 3 gaz ballonyn qaýipsiz jerge shyǵaryp, yqtımal jarylystyń aldyn alǵan.
Órt oshaǵyna 5 oqpan berilip, jalyndy sóndirýge birneshe tehnıka men jeke quram jumyldyryldy.
TJM málimetinshe, órt tolyq sóndirildi. Zardap shekkender joq.
Qazirgi ýaqytta órttiń shyǵý sebebi anyqtalyp jatyr.
Aıta keteıik, Aqmola oblysyndaǵy ulttyq park aýmaǵynda órt shyqty.
