Almatydaǵy Car City-de polıtseılerdiń reıdinen keıingi ahýal qandaı
ASTANA. KAZINFORM — Jýyrda Almaty polıtsııasy Car City avtokólik bólshekteri bazarynda aýqymdy reıd júrgizip, ondaǵan zań buzýdy anyqtap, birneshe adamdy ustady. Kazinform agenttiginiń tilshisi bazar aýmaǵyn aralap, ondaǵy qazirgi ahýaldy kórip qaıtty.
Polıtsııa departamentiniń málimetinshe, ınspektorlar beıbereket saýda, klıentterge maza bermeı, jumys oryndarynda jáne avtoservıs aýmaǵynda shylym shegý, sondaı-aq qoqys pen avtokólik bólshekterin ruqsat etilmegen jerlerde saqtaý faktilerin tirkegen. Sonymen qatar alkogol ishý jáne usaq buzaqylyq áreketterdiń joly kesildi.
Barlyǵy 38 adam ákimshilik jaýapkershilikke tartyldy. Polıtsııa bólimshesine 39 adam jetkizildi, olardyń arasynda tórteýi — shetel azamaty, sondaı-aq ata-anasynyń ruqsatynsyz jumys istegen birneshe kámeletke tolmaǵandar bar. Budan bólek, kólikti ruqsat etilmegen jerde toqtatqan 27 júrgizýshi jazalandy, 9 avtokólik arnaıy turaqqa qoıyldy.
Turǵyndardyń aıtýynsha, reıd kezinde negizinen shaǵyn kásiporyndar — avtoservıster men jol jıeginde saýda jasaıtyndar aıyppul arqalaǵan.
Qazir Car City mańynda bári tynysh. Polıtsııa kólikteri joq, satyp alýshylar men avtokólikter legi tolastaǵan joq, bazarda ádettegi qarbalas ómir jalǵasyp jatyr.
Tóle bı kóshesi jaǵynan aýmaq jol belgilerimen qorshalǵan — munda magıstraldy qalanyń shekarasyna deıin uzartý jumystary júrip jatyr.
Polıtsııa departamenti mundaı reıdter adamdar kóp jınalatyn jerlerde tártip pen qaýipsizdikti saqtaý úshin turaqty túrde ótkiziletinin atap ótti.
Buǵan deıin Almatynyń Aqsaı yqshamaýdanynyń turǵyndary sol kezdegi qala ákimine Car City avtokólik bólshekteri bazaryn qala syrtyna kóshirý týraly ótinish jasaǵan. Olar turaq oryndarynyń jáne serýen aımaqtarynyń joqtyǵyna narazylyq bildirgen edi.
Aıta ketelik Almatydaǵy Car City avtobólshekter bazaryn tekserý kezinde 39 adam ustalǵan edi.