Almatydaǵy burynǵy tramvaı deposynyń qazirgi jaı-kúı qalaı
ALMATY. KAZINFORM — Almaty kóshelerimen tramvaılardyń júrmegenine 10 jyldan astam ýaqyt boldy. Al bul qoǵamdyq kólik túriniń úıi bolǵan burynǵy tramvaı deposynyń aýmaǵy áli kúnge deıin qańyrap tur.
2015 jyly Almaty qalasynyń eks-ákimi Baýyrjan Baıbek megapolıstegi tramvaı qozǵalysyn toqtatý týraly sheshim qabyldady. Sol ýaqytta eski tramvaılardyń ornyna zamanaýı LRT jelisi salynatyny, al depo aýmaǵynda «Depo Evolution Park» kreatıvti haby bolatyny habarlandy. Onyń qurylysyn 2021 jyldyń sońynda aıaqtaý josparlanǵan edi, biraq joba júzege aspady.
Al 2022 jyly Almatynyń taǵy bir eks-ákimi Erbolat Dosaev burynǵy tramvaı deposynyń ornynda jalpyǵa qoljetimdi jastar ortalyǵy paıda bolatynyn aıtty.
Alaıda búginge deıin ol aýmaqta eshteńe salynǵan joq. Tramvaı deposy Almaty qalasynyń qurylys basqarmasyna qaramaǵynda tur.
Kazinform agenttiginiń fototilshisi bul jaqqa arnaıy baryp, onyń jaı-kúıimen tanysyp qaıtty. Qazir depo aınalasy qorshalǵan. Qorshaýdyń arǵy jaǵynan jartylaı buzylǵan kólikjaı men jan-jaqta shashylyp jatqan qurylys materıaldary kórinedi. 2026 jyldyń naýryz aıyndaǵy jaǵdaı boıynsha munda eshqandaı belsendi qurylys jumystary baıqalmaıdy.
Eske salaıyq, 2025 jyldyń qazan aıynda qala qurylysy keńesi tramvaı deposyn rekonstrýktsııalaýdyń jańa eskızdik jobasyn maquldaǵan bolatyn. Sol joba boıynsha bul aýmaqta qosymsha kórme alańdary, kópfýnktsıonaldy ıvent-keńistik jáne jaıaý júrginshiler men jasyl aımaqty keńeıtýge múmkindik beretin jerasty parkıngi paıda bolýy tıis. Almaty qalasynyń qurylys basqarmasy agenttik saýalyna bergen jaýabynda qurylys jumystarynyń áli bastalmaǵanyn habarlady.
— Burynǵy tramvaı deposynyń aýmaǵynda jańa nysan salýǵa qatysty 2025 jylǵy 4 naýryzdaǵy № 02-0037/25 memlekettik saraptama qorytyndysy bar. Qazirgi ýaqytta qurylys-montajdaý jumystaryna qarjy bólinýi qajet, — delingen vedomstvo jaýabynda.
Degenmen, bıýdjet qarajatynyń naqty qashan bólinetini ázirge belgisiz.
Eske salaıyq, buǵan deıin Almatyda LRT jobasynyń tehnıkalyq-ekonomıkalyq negizdemesi ázirlendi. Ol boıynsha jeńil relsti kóliktiń qurylysyn 2027 jyly bastaý josparlanyp otyr.