Almatydaǵy BRT qurylysy: Raıymbek dańǵyly qalaı jańartylady

ALMATY. KAZINFORM – Almaty ákimi Erbolat Dosaev Almaly aýdanynyń turǵyndarymen kezdesý barysynda kólik ınfraqurylymyn damytý josparlary jáne Raıymbek dańǵylyndaǵy BRT jobasy týraly aıtyp berdi.

«Kelesi jyly Raıymbek dańǵylyn tolyǵymen qaıta qurýdy josparlap otyrmyz. BRT qurylysy aıasynda qoǵamdyq kólikke arnalǵan arnaıy jolaqtan basqa, búkil kóshe abattandyrylady, ıaǵnı biz qasbetten qasbetke deıin búkil eni boıynsha júremiz. Jóndeý kezeńinde júrgizýshiler úshin belgili bir qolaısyzdyqtar bolady, biraq jumystar toqsan saıyn mınımaldy jabyndarmen uıymdastyrylady», - dep atap ótti Erbolat Dosaev.

Shahar basshysynyń sózinshe, uzyn avtobýstar jolǵa qoıylsa, qalanyń shyǵys jáne batys bólikteriniń baılanysy artady. Jobada eń az úzilistermen bólingen jolaqtardy, jańa aıaldama keshenderin uıymdastyrý, sondaı-aq dańǵyl boıyndaǵy keshendi abattandyrý qarastyrylǵan.

Aıaldamalardy platformalarda jabdyqtaý jáne qıylystarǵa jaqyn ornalastyrý josparda. Bul rette avtokólik qozǵalysyna arnalǵan jolaqtardyń negizgi sany saqtalady.

Joba birneshe kezeńge bólingen: Pýshkın kóshesinen Seıfýllın dańǵylyna deıin, Seıfýllın dańǵylynan Ahremenko kóshesine deıin jáne odan ári «Barlyq» bazaryna deıin.

Osyǵan deıin Almatynyń Raıymbek dańǵylynda BRT qalaı uıymdastyrylatyny týraly jazǵan edik.

Eske salaıyq, byltyr Almatynyń 2040 jylǵa deıingi Bas josparyn ázirleýshiler qoǵamdyq kólikti damytý perspektıvalary týraly aıtqan bolatyn.